Президентиниң грантылар фондузу-биле Тывада пенсионерлер аразында ниити ыры коллективтериниң фестивалы чоруп турар

Делегейниң Узун назылыглар хүнүнүң бүдүүзүнде, Тывада улуг назылыг улустар аразында ниити ырының республика фестивалы эртип турар. Бо пятницада, сентябрьның 20-де, республиканың найысылалынга “мөңгүн” ыраажыларның бирги, 25-те Кызыл-Мажалыкка – ийиги зона мөөрейлери болур. А сентябрь 27-де Тыва культура төвүнүң сценазынга фестивальдың республика чадазынга зона мөөрейлериниң тиилекчилери ужуражыр.

«Чуртталгада ыры-биле…» фестиваль – Президентиниң грантылар фондузунуң шугуму-биле деткимчени алган «Россия пенсионерлериниң эвилелиниң» Тывада регионалдыг салбырының улуг төлевилелиниң бирээзи болур. Авторлар ону боттандырарынга 641 муң рубльди алган. Төлевилелдиң шиитпирлээр кол айтырыы – республиканың пенсионерлеринге солун, шынарлыг болгаш чогаадыкчы дыштанылганы организастаары.

«Ооң мурнунда эрткен республиканың хор фестивальдары ырлаар чораан база аас чогаалын өөренип турган дыка хөй пенсионерлерни чыыпкан – деп, Пенсионерлер эвилелиниң Тывада регионалдыг салбырының даргазы, төлевилелдиң куратору Алла Хурума чугаалаан. – Олар киржиринге база тиилээринге, республикадан дашкаар чоруурунга сеткилинден сонуургалдыг. Бүгү-российжи фестивальдың 2019 чылда киржикчилери мөөрейлерге доктаамал киржир, хүннүң-не ырлаар база чоннуң ужурларын өөренир иштики күзелдерин чугаалап турар. Ам аарып-аржыыры, эпчоксунуп-оспаксыраары уттундурган».

Төлевилел боттандырылгазы-биле хоочуннар ансамбльдарын болгаш хорун чогуур хөгжүм техниказы-биле чепсеглээн: грант акшазы-биле микрофоннарлыг үн улгаттырар 3 улуг дериг-херекселди, 10 «Караоке» системаларын база «Шуйская гармонь» фабрикадан үш гармоньну садып алган.

Тываның Хоочуннар эвилелиниң дыңнадып турары, республиканың улуг назылыг 560 активчилери хор коллективтериниң фестивалының шупту чадаларында хаара туттунган.