Тываның Баштыңы Дээди Хуралдың чаа составында «Чаңгыс демниг Россия» төлээлери-биле ужурашкан

Тываның парламентизинде «Чаңгыс демниг Россия» партияның төлээлери сентябрь 26-да болуп эртер бирги организастыг хуралдың мурнунда боттарының туружун быжыглаан. Республиканың Баштыңы Владислав Ховалыг Дээди Хуралче соңгуткан чаңгыспартийжилери-биле ужурашканын ВКонтактыда бодунуң арынында дыңнаткан. Чаңгыс мандаттыг округтардан боттарын идип үндүрген үш депутат эрге-чагырга партиязынга каттыжар шиитпирни боттары хүлээп алганнар.

«Чаңгыс демниг Россия» бодунуң тергииделин быжыы-биле бадыткаан. Бодун идип үндүрген үш кижи каттыжып кээрге, ам партияны 28 депутат төлээлээр. Ол дээрге республиканың кол хоойлужудулга органының бүгү составының 87,5 хуузу-дур» - деп, Владислав Ховалыг бодунуң блогунда бижээн.

«Шимчээшкин болганындан» чаңгысроссчуларның партийжи даңзызында, азы фракцияның бодунуң составында база өскерлиишкиннер болган деп, республика баштыңы демдеглээн. Даңзыда үшкү черни ээлеп турган Россияның Маадыры Буян Куулар политиктиг карьерадан ойталап, ТШО-же аъттанып, РФ-тиң Чепсектиг Күштеринге албанын эрттирер деп шиитпирлээн. Ынчалдыр дайынчыларны база оларның өг-бүлелерин деткиир айтырыглар талазы-биле ол партийжи эштеринге консультацияларны бээр деп, Владислав Ховалыг чугаалаан.

Депутаттар-биле ужуражылга үезинде, бо парламент чылында кылыр ужурлуг ажылдарны шүүштүрген. «Мурнувуста уламчылаар ажылдар хөй. Тывага чурттуң президентизиниң келгениниң түңнелдери-биле амгы чорудуп турар ажылдарывысты, Россияның Чазааның удуртулгазы-биле ужуражылгаларывысты чугааладым. Демниг билчилгелиг кады ажылдажылга-биле мурнувуста салдынган сорулгаларны дүрген чедип алыр бис. Төрээн Тывавыстың чаагай чоруунга боттуг ажылдаары – чаңгыс сорулга ол» - деп, республика баштыңы дыңнаткан.

Сентябрь 8-те доозулган соңгулдаларның түңнелинде Дээди Хуралче «Чаңгыс демниг Россиядан» аңгыда үш партия эрткенин сагындыраал – парламентиде арткан дөрт олутту РФКП, «Чаа Кижилер» база ЛДПР аразында үлешкен. Коммунистерде ийи мандат болза, "Чаа кижилер" биле ЛДПР-ден – бир-бир.