«Тувинская правда» солун «Сибирь. ПРО» журналисчи мергежил конкурузунга тиилээн

18.09.2024

Новосибирскиге «Большая Сибирь: ПРОстранство для развития» деп кол теманы 2024 чылда чырыткан «Сибирь.ПРО» журналисчи мергежилге XIX регионнар аразының конкурузунуң түңнелдерин үндүрген. Сибирь федералдыг округ регионнарының электроннуг, парлалга болгаш четкилиг массалыг информациязының 30 ажыг корреспондентилери болгаш чогаадыкчы коллективтери лауреаттар санынче кирген.

Экономика темазынга элээн каш ажылдарны конкурсче киирген «Тувинская правда» солуннуң редакциязы парлалга болгаш четки үндүрүлгелерниң аразындан «Экономика» номинацияга тиилээн. Биче бизнести: сарлыктарны өстүрүп-көвүдедиринден эгелээш, арат ажыл-агый продуктуларын бүдүрер мини-цехке чедир ажыл-ижи чедиишкинниг чижектерни таныштырган материалдар колдаан.

Солуннуң кол редактору Юлия Манчин-оол, солуннуң 100 чыл болган оюнда коллективтиг журналисчи күш-ажылга ол хире улуг үнелелди алыры онза болгаш хүндүткелдиг-дир деп демдеглээн. «Оон-даа хөгжүп, ам-даа эки ажылдаарывыска идигни берди – деп, ол чугаалаан. - «Экономика» номинацияга тиилээнинивис анаа эвес, бистиң чаңгыс чер чурттугларывыстың аразында күш-ажылы-биле чүгле боттарын эвес, а ажылдап алыр арганы өскелерге берип чоруур кижилер хөй. Күрүне детикимчезиниң янзы-бүрү программаларын шын ажыглааш, бут кырында туруп келген, чаа-даа эгелеп чоруур бистиң сайгарлыкчыларывыс бар».

Сибирь федералдыг округда Россия Федерациязының Президентизиниң бүрүн эргелиг төлээзи Анатолий Серышев тиилекчилерге шаңналдарны тывыскан. Ол байыр чедирип тура, журналист кижиниң төөгүлүг хүлээлгези – бурунгаар бодалдарны хевирлеп, эң нарын социал ужур-уткалыг айтырыгларга харыыларны тып, ниитилел хөгжүлдезинге идигни бээри болур деп демдеглээн.

Конкурс хемчеглериниң үезинде, федералдыг башкарыкчы эксперттер кирижилгези-биле журналистерге өөредилге семинарлары болгаш темалыг сессияларлыг «Сибиржи медианеделяны» эрттирери чаңчыл болур берген. Төлевилелдерниң тиилекчилери парлалга-турунуң үезинде Сибирьниң улуг үлетпүр объектилерин кезип сонуургаан.

2006 чылдан бээр Сибирь федералдыг округда Россия Федерациязының Президентизиниң бүрүн эргелиг төлээзиниң деткиишкини-биле журналисчи мергежилдиң «Сибирь.ПРО» регионнар аразының конкурузун эрттирип турар. 19 чыл дургузунда ук төлевилелдиң мөөрейлеринге 4 муң ажыг авторлар база 700 хире сибирьжи медиа бөлүктер киришкен. Бо чылын округтуң шупту регионнарындан журналистер ийи чүс хире ажылдарны жюриниң шииткелинче киирген.

Нравится