Тываның ажыл-агыйлары сентябрь ортанга чедир 162 муң ажыг тонна сиген-ширбиилди белеткээн

Регионнуң малчыннары малдың хүр кыштаглаашкынынга херек мал чеминиң 72 хире хуузун кезип белеткээнин республиканың Көдээ ажыл-агый яамызы дыңнаткан.

Бии-Хем кожуун мал чеми белеткээр планын 90 хуу ажырып, мурнуку одуругже үнген. Барыын-Хемчик, Тожу база Сүт-Хөл кожууннар бичии-ле четпес – 90 хуу чеде берген. Кызыл биле Бай-Тайга кожууннарның ажыл-агыйлары планын 80 хуу ажырган.

Бөгүннүү-биле алырга, Эрзин кожуун мал чеминиң белеткелинде эң сөөлгү черде, ында сигенниң дүжүдү бир гектардан 4 центнер болза, а республикада гадан ортумаа-биле 11 центнерни кезип ап турар. Кожуун планының чүгле 42 хуузун белеткеп алган. Ол ышкаш Мөңгүн-Тайга – бир гадан чүгле 5 центнер сигенни кезип ап турар.

Тываның Баштыңы Владислав Ховалыг, хожудап турар ажыл-агыйларже болгаш кожууннарже онза кичээнгейни углаарын Көдээ ажыл-агый яамызынга база кожуун чагыргаларынга сагындырган. Бо чылын оът-сиген үнмээн, чедери берге черлерде малчыннарга сиген садып алырынга субсидия бээр дугайында шиитпирни хүлээп алган.

Көдээ ажыл-агый яамызы мал чеми немей садып алыр дээн ажыл-агыйларга эптиг кылдыр, мөөңү-биле садар өртекке сиген садып турар республиканың кол садыгжыларының база Красноярск край биле Хакасияның көдэ ажыл-агый бүдүрүкчүлериниң реестрин тургускан. Шупту муниципалдыг тургузугларже информацияны чоруткан.

Мал чемин колдуунда-ла суггаттыг черлерден, ол ышкаш эрткен чылдарда тараан хөй чылдыг сиген шөлдеринден кезип белеткеп турар. Хову-шөлдерде дөрт муң хире ажылдаан. Олардан 325 механизастаттынган база 1660 хол-биле кезер сигенчилер бригадалары тургустунган.

Мал чеминиң муниципалдыг курлавыр белеткелин Чеди-Хөл кожуун дооскан болза, Чөөн-Хемчик биле Таңды доозар чоокшулаан.

Бо чоокку хонуктарда республиканың Көдээ ажыл-агый яамызы хол-биле сиген кезикчилериниң ортузунда чарлаттынган республика мөөрейи доостур. Ведомствонуң медээзи-биле алырга, аңгы-аңгы муниципалитеттерден тос бригада аңаа киржир чагыгны киирген. Бай-Тайганың көдээ ишчилери эң-не сонуургалдыг киржип турар – дөрт бригада мөөрейде кожуунун төлээлээн.