Тыва Республиканың Күрүне тугунуң хүнүн демдеглээн

Бөгүн Тыва Республиканың Күрүне тугунуң хүнүн демдеглеп эрттирип турар. Регионнуң Баштыңы Владислав Ховалыг төрээн республикавыстың чаагай чоруу дээш амыдырап-чурттап база ажылдаарының бир кол ыдыы - Тываның Тугунда деп, бодунуң байыр чедириишкининде демдеглээн.

2022 чылдың төнчүзүнде республика Баштыңының адынга «Тываның буянныг чүректери» аныяктар шимчээшкининден чаа байырлал хүнүн тургузар дугайында санал кирген. Бо хүннү тургузары төрээн чериниң төөгүзүнүң дугайында уругларның билиглерин калбартырынга дузалаар деп, шимчээшкинниң киржикчилери тайылбырлаан. 2023 чылдың майда Тыва Республиканың парламентизи регионга чаа күрүне байырлалын тургускан.

Бистиң Тугувуска тураскааткан тускай хүннү доктаадыр инициативаны аныяктар киирген турган. Ол төрээн Тывазынга ынакшылының, аңаа чоргааралының, ол ышкаш республиканы хөгжүдүп сайзырадырынга беленин, ону оон-даа эки болдурар дээш күжүн болгаш талантызын киириштиреринге беленин чугаалап турар – деп, Владислав Ховалыг чугаалаан.

Республика девискээринде чаа байырлалга тураскааткан хөй санныг хемчеглер эртип турар. Улусчу чогаадылга бажыңындан туктарлыг үнген патриотчу авточарыш эң чараш хемчег болганы чугаажок. Тываның Күрүне тугун Дөгээ даанга киискиткен. Авточарышка 20 автомашина киришкен.

Республиканың муниципалитеттеринге культура-чырыдыышкынныг хемчеглерни, школаларга «Тыва Республиканың күрүнениң ыдык демдектери» темага класс шактарын эрттирген.

Россияның Журналистер эвилелиниң кежигүнү, чурукчу Оюн-оол Доктугуевич Сат республика тугунуң автору дээрзин сагындыраал.