Тываның Баштыңы арга-арыг өрттерин чок кылырынга дузалашканы дээш Авиаарга-арыг камгалалының ажылдакчыларынга четтиргенин илереткен

Тываның Баштыңы Владислав Ховалыг социал четкилерде бодунуң блогунда, сөөлгү каш айларда российжи регионнарның арга-арыг албанының база федералдыг Авиаарга-арыг камгалалының специалистери республикага чурттавышаан, тайга-даксыл берге черлерде өрттерни өжүреринге тыва коллегаларынга дыка улуг дузаны көргүскени дээш четтиргенин илереткен.

«Бо чайның кончуг изиинде арга-арыг өрттерин өжүржүрүнге биске дузалалажыры-биле Тывада келген өске регионнарның шупту командаларынга четтиргеним илередип тур мен. Бөгүн олар чаныпканнар» - деп, Владислав Ховалыг дыңнаткан.

Тывада арга-арыг өрттерин өжүржүрүнге 260 ажыг кижи: Красноярскиниң арга-арыгны агаардан болгаш черден камгалаар баазаның, Томск, Новосибирск база Забайкальениң арга-арыгны агаардан камгалаар баазаларының, «Хакасияның арга-арыглары» автономнуг албан чериниң специалистери, Бурятия база Иркутск облазының «Авиалесоохрана» ФБА федералдыг курлавырының ажылдакчылары киришкенин сагындыраал. 30 авиадесантылардан тургустунган бирги бөлүк Красноярскдан август 8-те ужуп келген дораан-на Таңдының арга-арыг ажыл-агыйында ийи улуг өрттерни өжүржүп эгелээн. А августтуң 30-31-де сөөлгү келген краснояржылар – 80 кижини аңгы-аңгы черлерже хувааган.

Сентябрьда өртчүлерге агаар-бойдус дузалаан, дагларда эң берге өрттерни специалистер чок кылган. Таңды кожуунда Марачёвка чоогунда өрттү чаа-ла өжүрген. Бөгүннүү-биле алырга арткан беш өрттү: Таңдыда Бай-Хаактан мурнуу-барыын талаже 12 база 18 км-де ийи, Кызыл кожуунда Баян-Колдан соңгу-чөөн талада 32 км-да, Каа-Хем кожуунда Катазы арбандан 23 км-да база Кагжирба чурттакчылыг черден 39 км-де өрттү өжүрериниң кырында келген. Оларны бо хонуктарны өжүрүптер. 126 өртчүлер чана бергеннер. Өрт-биле демиселдиң кончуг дээн үезинде 600 ажыг кижи киржип турганын сагындыраал.

Метеорологтар бо чоокку ийи хонукта Тывага чаъс чаарын, чер-черлерге өл хар дүжерин аазаан. Ооң-биле кады дүне агаарның температуразы бадар, оруктарга дайгактаар чадавас.

Республиканың Арга-арыг яамызы арга-арыг өрттери чавырылганы-биле, девискээрлерде муниципалдыг деңнелдиг онза байдал чурумун соксадырын Таңды биле Каа-Хем кожуун чагыргаларынга сүмелээн. Ооң соонда арга-арыгларда республика чергелиг киирген онза байдалды ап кааптар. Регионда өртке удур онза байдал чуруму сентябрь төнчүзүнгечедир уламчылаар, ынчалза-даа ону кошкаткан: ам чурттакчы чон эрттирилге бижиктерлиг арга-арыгже кирип болур.