Тывада Дээди Хурал депутаттарынче соңгулдаларның түңнелдери-биле хөй партиялыг парламент бир дугаар тургустунган

Тываның Соңгулда комиссиязы Тыва Республиканың Дээди Хуралының (парламентиниң) дөрткү чыыжының депутаттар соңгулдаларының төнчү түңнелдерин үндүрген. Сан-чурагайларда улуг-ла өскерилгелер чок болган. «Чаңгыс демниг Россия» партиязының соонда, РФКП-ның саны 5,47 хуу апарып, ийи дугаарынче үнген. А «Чаа кижилер» партия 5,41 хуулуг көргүзүү-биле үшкү черде.

Төнчү сан-чурагайлар мындыг:
«Чаңгыс демниг Россия» – 80,01 хуу;
РФКП – 5,47 хуу;
«Чаа кижилер» – 5,41 хуу;
ЛДПР – 5,04 хуу;
«Чөптүг Россия – Патриоттар – шын дээш» – 3,29 хуу.

Элээн каш партиялар бадылаашкынның түңнелдери-биле адаккы деңнелди ажып, амгы үениң төөгүде республиканың парламентизин бир-ле дугаар хөй партийжи болдурган. Дээди Хуралче дөрт партия эрткен: «Чаңгыс демниг Россия», РФКП, «Чаа кижилер» база РЛДП.

Республиканың чаңгыс аай соңгулда округундан «Чаңгыс демниг Россия» 12 мандатты, РФКП – 2 база РЛДП биле «Чаа кижилер» партиялар 1-1 мандаттарны алганын, Тываның Соңгулда комиссиязы дыңнаткан.

Соңгулдаларның түңнели-биле, чаңгыс мандаттыг округдан «Чаңгыс демниг Россия» 13 мандатты, үш мандатты боттарын идип үндүрген – Роберт Доржу (№ 16 округ), Буян Биче-оол (№ 11 округ) база Саян Ондар (№ 10 округ) олар алганнар. Чаа соңгуткан депутаттар аразында – тускай шериг операциязының киржикчилери база барын демдеглээлиңер.

Тываның Баштыңы Владислав Ховалыг шупту кандидаттарга болгаш республиканың чонунга соңгулдаларга идепкейлиг киржилгези дээш четтиргенин илередип, хөй партиялыг парламент соңгукчу бүрүзүнүң политиктиг көрүжүн болгаш сонуургалдарын – демократия барын бадыткаан деп демдеглээн.

«Партийжилерниң составы 60 хуу чаартынган. Чүгле чаңгыс чүүл өскертинмээн: Төрээн Тывазының чаагай чоруу дээш боттуг ажыл-херектери. Чижээ, «Чаңгыс демниг Россия» командазы бо удаада бүдүн республикадан 50 муң ажыг чагыгларны чыгган. Ол бүгү партияның чоокку чылдарда боттандырар улусчу программазынче кирер» – деп, регионнуң удуртукчузу бижээн.

Дээди Хуралдың чаа составының бирги сессиязын 2024 чылдың сентябрь 26-да планнаан, амдыызында хуралдың айтырыгларын тургузуп турар.