Владислав Ховалыг биле Максим Решетников Тывага туризмни сайзырадырынга дээштиг аргаларны чугаалашкан

Россияның экономиктиг сайзырал сайыды Максим Решетников база Тыва Республиканың Баштыңы Владислав Ховалыг регионче аян-чорукчуларны хаара тударынга таарымчалыг черлерни база чаа төлевилелдерге турисчи инфраструктураны тударының аргаларын сайгарып чугаалашкан. Дүрген эптеп салыр аалчылар бажыңнарын тударынга субсидиядан алыр арганы – күрүне деткимчезин ажыглаарын сайыт сүмелээн.

«Туризм болгаш хүндүлээчел чорук индустриязы» национал төлевилелдиң эң-не дээштиг аргаларының бирээзи ол. Субсидияны ажыглап, нарын инфраструктура тудуушкуну негеттинмес өрээл фондузун дүрген көвүдедип, экологтуг туризм, арыг агаарга дыштанылга дээн ышкаш рыноктуң перспективтиг талаларын хөгжүдүп болур» — деп, сайыт демдеглээн.

Россияның Президентизи Владимир Путин 2024 чылда модульдуг гостиницаларны субсидиялаар программаның чаа конкурузун үш чылда эрттирер дээн саналды деткээн. Ол сорулгаже 15 млрд рубльди тускайлаар.

Путин бистиң республикага ажыл-агый аайы-биле кээп чорааш, Тываны хөгжүдериниң перспективтиг адырларының бирээзи туризмде деп демдеглээн. Президент ону республиканың байлак, онзагай бойдузу-биле холбап, аян-чорукчулар санын көвүдедиринче кичээнгейни угландырган. Гостиницалар база дыштанылга бажыңнарының өрээл фондузун калбартпышаан, солун турисчи программаларны саналдаарын регионнуң социал-экономиктиг хөгжүлде айтырыгларын сайгарган хуралда чугаалаан.

Тываның Баштыңы РФ-тиң экономиктиг сайзырал сайыды-биле ужуражып тура, хөгжүлдениң бот-тускай программазын узадырын, регионга онза экономиктиг зонаны тударын база индустриалдыг парктарны хөгжүдерин чугаалашкан.

«Республиканың Өвүр кожуун девискээринге онза экономиктиг зонаны тударын планнап турар бис. 2025 чылда бүрүн эде чаартынар „Хандагайты“ делегей чергелиг автомобиль эрттирилге пунктузунуң чоогунга ол турар. Регионда ИПР-ни боттандырганындан индустриалдыг болгаш агроүлетпүр парктары туттунган. Ында дүктүң бирги болбаазырадылга цехтери база эт-сеп кылыр фабрика бар. Келир үеде туттунар онза экономиктиг зона девискээринге база бир индустриалдыг паркты ажыдар арганы көрүп тур бис» — деп, Владислав Ховалыг дыңнаткан.