Владислав Ховалыг Россияның саң-хөө сайыды Антон Силуанов-биле бюджет айтырыгларын чугаалашкан

Москвага ажыл-агыйжы сургакчылаашкын үезинде Тываның Баштыңы Владислав Ховалыг Россияның саң-хөө сайыды Антон Силуанов-биле Тываның бюджедин өйлээриниң айтырыгларын чугаалашкан.

Сентябрь 2-де чурттуң Президентизиниң эрттиргени Тываның социал-экономиктиг хөгжүлдезиниң талазы-биле хуралда Россияның саң-хөө сайыды Антон Силуанов регионну деткиир немелде акша-хөреңгини тыварын дыңнаткан. Россияның Чазаа сентябрь 5-те республикага 1,7 млрд рубль акшаны тускайлаар дугайында айтыышкынны үндүрген.

Ол акша-хөреңги бюджет адырының ажылдакчыларының шалың төлевирин улгаттырарынче угланыр. 2023 чылдың түңнели-биле алырга, Тывада ортумак шалың төлевири 47641 рубль болган, а 2024 чылда 53067 рубль чедерин Тываның Саң-хөө яамызы дыңнаткан.

«Бистиң ажылывыска бедик демдекти салганы дээш Антон Германовичиге өөрүп четтиргеним илереттим. Сайыт республиканың экономиказы сайзыраанын, бодунуң бюджет орулгалары Россияда ортумак көргүзүгден улгатканын онзалап демдеглээн. Ол база улуг харыысалга-дыр. Президентиниң демдеглээни ышкаш, чедип алган темпини бадырып болбас. Ажылды ам-даа уламчылаар» - деп, Владислав Ховалыг демдеглээн.

Владимир Владимирович Путинниң даалгалары езугаар регионнуң социал хүлээлгелерин база бүрүн эргелерин күүседиринге херек чедер акша-хөреңги хандырылгазын федералдыг деңнелде чедип алыры Тываның Чазааның база Саң-хөө яамызының мурнады боттандырар ажылы болур.