Москвадан эксперттер Тывада турберкулез-биле демисел экижээнин демдеглээн

Тывада туберкулезту эге чадазында илередип эгелээнинден оон чок болур чорук 16 хуу кызырлып, хоочураан аарыг кижилер саны эвээжээн. Россияның Кадык камгалал яамызының фтизиопульмонология болгаш халдавырлыг аарыглар национал медицина шинчилел төвүнүң эксперттер бөлүүнүң чорутканы аудит ындыг көргүзүглерни айыткан.

Россияның Кадык камгалал яамызының эмчи-методизи, Национал медицина шинчилел төвүнүң кол эртем ажылдакчызы Валерий Бурыхин баштаан делегация-биле ужуражылгада республиканың кадык камгалал сайыды Анатолий Югай база тускайжыттынган эмнелге албан черлериниң эмчилери тубркулез болгаш халдавырлыг аарыглар талазы-биле эпидемиологтуг байдалды сайгарып чугаалашкан.

Республиканың дөрт эмнелгези – туберкулезка удур диспансер, СПИД-биле демисел болгаш профилактика төвү, халдавырлыг аарыглар эмнелгези, Чөөн-Хемчиктиң кожууннар аразының эмнелге төвү аудитти эрткен.

Эмчи дузазының көргүзүглери бедээнин хыналда илереткен. Эрткен чылдың ол үезинге деңнээрге, алды ай дургузунда чурттакчы чонну профилактиктиг шинчилгеже хаара тудары улгаткан. Ооң мурнунда ол көргүзүг 39 хуу турган болза, ам 64 хуу четкен. ФГ-шинчилелче хаара тудары 19 хуу, уругларга иммунодиагностика үш катап көвүдээн.

Кадык камгалал яамызы туберкулез-биле демисежир регионалдыг программаны боттандырганындан фтизиатрия албанының эки ажылдаанын айыткан. Удавас туберкулезка удур диспансерниң лабораториязынга чаа дериг-херекселдерниң база «Камаз» автомашинада таарыштыр дерээн көжүп чоруур чаа флюографияның кээрин манап турарын Кадык камгалал яамызы дыңнаткан.

Келир чылын Чөөн-Хемчиктиң эмнелге төвүнге келир чаа флюорограф профилактиктиг шинчилелдер санын көвүдедири чугаажок. Республика бюджединден эмнер садып алырының акшаландырыышкынын 19 млн рубль чедир улгаттырган.

Москвадан делегация-биле ужуражылганың түңнелинде, Россияның Кадык камгалал яамызының фтизиопульмонология болгаш халдавырлыг аарыглар национал медицина шинчилел төвүнге Тывадан рентгенолог, эндоскопист, фтизиатр база бактериолог эмчилерни өөредип алырын дугурушкан.