Марат Хуснуллин Тывада чуртталга тудуу тергиин эки чоруп турарын демдеглээн

Тываның Баштыңы биле чурттуң Чазак даргазының оралакчызы Марат Хуснулинниң ужуражылгазының кол темазы - 2024 чылда республиканың социал-экономиктиг хөгжүлде айтырыглары болган.

   Чурттуң Президентизи Владимир Владимирович Путин чоокта чаа республикага кээп чорааш, кыска хуусаа иштинде Тыва тудуг адырын 53 хууга өстүрүп, уруглар садтары болгаш школалар дээш, чугула херек социал объектилерни туткан, ынчангаш ол бедик темпини олчаан салбазын чагаан. 

Тываның Баштыңы Владислав Ховалыг Россия Чазааның вице-премьери-биле ужуражылгада, бот-тускай хөгжүлде программазы-биле регионда боттуң тудуг материалдарын бүдүрүп эгелээнин дыңнаткан. «Кызыл агломерациязының мастер-планын келир үеде ажылдап кылгаш, ону боттандырарын көрүп, ажылды комплекстиг чорударынга шупту күрүне аргаларын ажыглаар» – деп, Владислав Ховалыг демдеглээн.

Россияның Чазааның деткимчези-биле республикада 2 хуулуг чиигелделиг ипотеканы кииргени, чуртталга тудуун улгаттырарынга күштүг шимчедикчи болган. 2023 чылдың сентябрьдан 2024 чылдың июль 1-ге чедир чиигелделиг тыва ипотека программазы-биле 2,2 муң өг-бүле боттарының чурттаар оран-саваларын садып алган.

Марат Хуснуллин республика эрге-чагыргазының чуртталга комплекизин, ылаңгыя чуртталга тудуунуң адырын мөөңнээр дээн күжениишкиннерин, хамаатыларның таарымчалыг чуртталга байдалының чугула кезээ – коммунал инфраструктураның чаартылгазынче кезээде улуг кичээнгейни углап турарын бедии-биле үнелээн деп, Федералдыг чазактың парлалга төвүнүң дыңнаткан. 

«Регион дыка хөй программаларга четтигип турар. Бо чылдың чеди айында чуртталга оран-савазының талазы-биле тулган үре-түңнелдерни көргүскен. Эрткен чылга деңнээрге 52 хуу хөй, 192 муң дөрбелчин метрни ажыглалче киирген. Кызылда арыглаашкын тудуунуң күчүзүн улгаттырар аргазын база көрдүвүс. Хоорай тудуу доктаамал улгадып турар – бөгүнде ол 1 млн дөрбелчин метр четкен, ынчангаш чаа арыглаашкын тудуу найысылалдың шапкын хөгжүлдезинге херек. Ужуражылга үезинде Шагаан-Арыгга база Ак-Довуракка котельная тудугларын база чугаалаштывыс» – деп, РФ-тиң Чазааның даргазының бирги оралакчызы чугаалаанын сайтыда айыткан.

Тываның орук адырын улаштыр хөгжүдер айтырыгны ийи тала чугаалашкан. «Енисей» Р-257 федералдыг оруктуң участоктарын, ол ышкаш республиканың кол дамыры -  Абакан – Ак-Довурак оруун нормага дүүштүр кылырын чугаалажып көрген. 2024 чылда республиканың социал-экономиктиг хөгжүлде айтырыгларын ужуражылга үезинде чугаалашкан.