Тывада хереглелдиг өг-бүлелерге өрт медээчилерин салыр кампания эгелээн

Республикада одалга сезону эгелээри-биле хуу бажыңнарда чурттакчы чонга угарлыг ыштан хораннанып болурунуң айыылы улгадыр. Регионалдыг Кадык камгалал яамызы 2023 чылда угарлыг ыштан тос бичии уруг мөчээнин, 2024 чылда үш чаштар угаарлаанын дыңнаткан. Тываның ОБЯ-зы эрткен чылын 782 өрт болганын, аңаа тос кижи чок болганын, 39 кижи кемдеп-өрттенгенин демдеглээн.  

Өлүмнүг таварылгалар печка-биле одаар бажыңнарга болуп турарын специалистер демдеглээн. Печканы ажыглаарының өртке удур айыыл чок дүрүмнерин үрээни - бажың өрттериниң кол чылдагааны бооп артпышаан.  

Тываның Күш-ажыл яамызы айыыл-халаптарны болдурбазы-биле, айыылдың диргелип келгенин дыңнадыптар өрт медээчилерин саткаш, салып турар. Бо хүнге чедир 348 медээчини салган, чыл төнчүзүнге чедир ам-даа 1500-ти салыр. Республикада ындыг деткимче 2018 чылда-ла эгелээн, бо хүнге чедир 3350 медээчини эптеп, салган.

Угаанныг дериг-херекселдерни кымнар алыр ужурлугул: - эвээш орулгалыг, хөй ажы-төлдүг өг-бүлелер, шимчей албас социал камгалалы кошкак кижилер. 

Тываның деткимче хемчээн ап болур чурттакчылары ачы-дузаны алыр дизе, өг-бүле кежигүннериниң орулгаларын болгаш эрге-байдалын шынзыткан документилерин четчелээш, муниципалдыг социал дуза төптеринче баар.