Тыва Чазааның даргазының бирги оралакчызының албан-хүлээлгезин күүседир кылдыр Мерген Хомушкуну томуйлаан

Тыва Республиканың Чазааның даргазының экономика айтырыгларның талазы-биле бирги оралакчызының албан-хүлээлгезин күүседир кылдыр Мерген Борисович Хомушкуну томуйлаан.

Томуйлаашкын мурнунда ол Тыва Республиканың Баштыңының Администрация болгаш Тыва Республиканың Чазак Аппарадының удуртукчузунуң бирги оралакчызы - Тываның Чазааның комплекстиг социал-экономиктиг хөгжүлде департаментизиниң начальнигинге ажылдап турган.

Мерген Хомушку М.В. Ломоносов аттыг Москваның күрүне университединиң магистратуразын «менеджмент» мергежилдиг дооскан. Аңгы-аңгы угланыышкыннарга, ооң иштинде банк, тудуг, саң-хөө адырларынга ажылдаан байлак арга-дуржулгалыг. Тыва Республиканың тудуг база чуртталга-коммунал ажыл-агый сайыдының оралакчызы албан-дужаалдарга ажылдап чораан. 2024 чылдың ортаа үезинге чедир Тываның Культура яамызының тудуг объектилерин удурткан.

Тываның Чазааның бирги вице-премьери албан-дужаалдың күүседикчизи Тываның девискээринде улуг инвестиция төлевилелдериниң база национал төлевилелдерниң күүселдезин хайгаараар экономика угланыышкынын удуртуп башкарар.