Тывада өртке удур онза чурумну сентябрьның 10-дан 30-ге чедир узаткан. Республика чазааның чогуур доктаалын бөгүн регионнуң албан езунуң порталында парлаан. Бо чылдың апрель 12-де онза чурумнуун кииргенин, бо үеге чедир ону алды катап узатканын сагындыраал. 

«Тыва Республиканың чурттакчылыг черлериниң болгаш өнчүнүң аңгы-аңгы объектилериниң өртке удур камгалалын быжыглаар, өрт айыылының деңнелин эвээжедир, улуг арга-арыг азы техногенниг өрттерни болдурбас сорулга-биле» чурумну киргенин документиде тайылбырлаан. 

Өртке удур онза чурум үезинде арга-арыгга хамаатыларның чоруурун, ынаар транспорт аймааның кирерин, арга-арыгга, көдээ ажыл-агый ажыглалдыг черлерге, куруккан черлерге, хову шөлдерге одаг кыпсыры, кургаг оът-сиген, боктер өрттедири хоруглуг. 

Өртке удур онза чурум үезинде арга-арыгга өртке удур айыыл чок чоруктуң чурумнарын үрээн тавырылгада административтиг торгаалдарны онаар. 

Республикада өртке удур онза чурум-биле чергелештир арга-арыгларда регионалдыг деңнелдиг чурум ажылдап турар. Арга-арыгда байдал хенертен баксыраанындан регионнуң баштыңы Владислав Ховалыгның август 17-де шиитпири-биле ону киирген. 

Бөгүн, сентябрь 9-та, Тываның арга-арыг фондузунуң черлеринде 25 267 га шөлде 9 арга-арыг өрттери хып турар. 2024 чылда өрт айыылының сезону эгелээнинден 41151,39 га ниити шөлдүг 202 арга-арыг өрттери бүрүткеттинген. Эрткен чылдың бо үезинде 3581,5 га шөлге 96 арга-арыг өрттери болган турган.