Тыва биле Кузбасс — соңгулдада келиишкин талазы-биле Сибирь регионунда мурнуку черде

Эрткен соңгулдаларның баш бурунгаар сан-чурагайындан алгаш көөрге, Сибирь федералдыг округтуң регионнарындан Тыва биле Кузбасс соңгулда участоктарынче соңгукчуларның эң бедик келиишкинин көргүскен.

Бүгү чуртка эрткен Чаңгыс аай бадылаашкын хүнүнде, Алтай Республикада биле Кемерово область–Кузбасста дээди албан-дужаал - Баштыңче, Алтай биле Тыва республикаларда хоойлужудулга органнарының депутаттарынче, база ол ышкаш 160 ажыг төлээлекчи органнарже база 150 хире муниципалитеттер баштыңнарынче соңгулдалар болуп эрткен. Хакас Республика тус черниң кампаниязы-биле чергелештир РФ-тиң Күрүне Думазынче депутатты немей соңгаан. Округтуң регионнарынга аңгы-аңгы деңнелдиң депутаттарын немей соңгаан 110 ажыг кампания болуп эрткен.

Бадылаашкынның баш бурунгаар медээзинден алырга, Алтай Республика биле Кемерово область–Кузбасстың баштыңнарынче соңгулдаларда регионнарны түр када удуртуп турган Андрей Турчак биле Илья Середюк тиилээн. “Чаңгыс демниг Россия” партиядан кандидаттар Алтай Республика биле Тыва Республиканың хоойлужудулга органнарының база Иркутск хоорайның Думазының депутаттарынче эң хөй үннү алганнар. Абакан хоорайның баштыңында амгы мэр Алексей Лемин хевээр арткан.

РФ-тиң Президентизиниң Сибирь федералдыг округта бүрүн эргелиг төлээзи Анатолий Серышев Сибирьниң регионнарынга соңгулда чорудуу бедик организастыг деңнелге эртип, соңгукчуларның соңгуур эргелери бүрүн сагыттынганын бедии-биле үнелээн.

“Чаңгыс аай соңгулда хүнүнде сибирьжилер боттарының регионнарының хөгжүлдезиниң курузун деткип, Россияның бот-догуннаашкынын быжыглаарынга идепкейлиг хамааты туружун болгаш чаңгыс демин көргүскеннер” - деп, РФ-тиң Президентизиниң Сибирь федералдыг округта бүрүн эргелиг төлээзи Анатолий Серышев демдеглээн.

Регионалдыг соңгулда комиссияларының дыңнатканы болза, бадылаашкын үезинде чурум хажыдыышкыннары демдеглеттинмээн.

“Сибирьниң регионнарынга соңгулдалар бедик организастыг деңнелге эртип, соңгукчулар бир демниин болгаш эрге-чагыргага бүзүрелин илереткен. Бистиң чуртувустуң удурланыкчылары информастыг ыйыдыышкынны чорудуп турар үеде, ол онза чугула. Россияның чаагай чоруу дээш демниг ажылдаар дизе, соңгулда чорудуунуң киржикчилери шупту билчилгелиг чугааны бөгүн тургузар апаар” – деп, бүрүн эргелиг төлээ чугаалаан.