Тываның Баштыңы Владислав Ховалыг: "Чаңгыс чер чурттугларывыс хөгжүлде дээш шилилдени кылган"

Республиканың Дээди Хуралынче база муниципалдыг тургузугларның төлээлекчилер хуралдарының депутаттарынче соңгулдаларда бадылаашкынның баш бурунгаар түңнелдеринден алырга, «Чаңгыс демниг Россия» партия дээш соңгукчуларның 80 ажыг хуузу үннерин берген.

Тус черниң хоойлужудулга органнарынче депутаттарны соңгуурунга чурттакчы чоннуң эң хөй үн берген чурттуң регионнарының санынче республиканың киргени эң эки түңнел деп, Тываның Баштыңы Владислав Ховалыг бодунуң блогунда дыңнаткан. «Бистиң чаңгыс чер чурттугларывыс хөгжүлде дээш шилилгени кылган болганда, оларның бүзүрелин шынзыдар ужурлуг бис» - деп, Владислав Ховалыг бодунуң блогунда тайылбырлаан.

Россияның Төп соңгулда комиссиязының дыңнатканы болза, Тывада «Чаа кижилер» партия 5,38, КПРФ - 5,23 хуу соңгукчуларның үннерин алган. ЛДПР - 4,50, «Чөптүг Россия – Шын дээш» партия - 3,33 хуу болганнар.

Республиканың чаа парламентизи-биле үре-түңнелдиг чугааны тып, чөптүг сайгарылганы база төлевилелдерге деткимчени алыр бодап турарын Тываның Баштыңы демдеглээн. Президент Владимир Путинниң неделя бурунгаар республикага ажыл-албанының үезинде демдеглээни өзүлдениң темпизин хевээр арттырары чугула деп, ол сагындырган.

Тускай шериг операциязының киржикчилерин чазак биле парламентиниң кады деткиири - чугула ажыл дээрзин регионнуң баштыңы айыткан. «Шериг албанныгларга көскү деткимчени чедирер дээш бистиң ниитилелдиң бүгү-ле күштерин мөөңнээр ужурлуг бис. Оларга быжыг тыл болбушаан, фронтуга тиилелгени чоокшуладырынга ам-даа дузалажыр» - деп, Владислав Ховалыг чугаалаан.