Владислав Ховалыг: ТШО киржикчилеринге дуза - чаа парламентиниң мурнады боттандырар угланыышкыны бооп артар

Тываның Дээди Хуралының (парламентиниң) чаа составының кол айтырыы - тускай шериг операциязының киржикчилеринге дузалажыры болгаш деткиири болур. Республиканың Баштыңы Владислав Ховалыг ооң дугайында ТАСС-ка дыңнаткан.

Сентябрь 8-те, Чаңгыс аай бадылашкын хүнүнде, Тываның парламентизинче соңгулдалар болуп эрткен. Республикага 182 соңгулда участоктары ажылдаан. Москваныы-биле 14.00 шакка, тус чернии-биле 18.00 шакка чедир келиишкин 48,47 хуу болган.

"Бир дугаарында, чаңгыс аай бадылаашкын хүнүнге идепкейлиг киришкен шупту кижилерге четтиргеним илереттим. Бистиң командавысты чон деткээн боор деп идегеп тур мен. Тускай шериг операциязының маадырлары киржип турар болгаш, ол дыка чугула. Республика шериг албанныгларга ам-даа дузалаар. Материал-техниктиг дериг-херекселдерни садып, дузаламчыны чедирер дээш, дузаны ам-даа көргүзер бис. Тускай шериг операциязынга киржип чораан, чаа соңгуткан депутаттарывыс бистиң дайынчыларывыска ниитилелге бодун тып алыр арга-хевирлерни ажылдап кылып, оларны сайзыраңгайжыдарын чедип алыр боор деп бодап тур мен" – деп, В. Ховалыг чугаалаан.

Тываның баштыңы соңгулдаларның түңнелдери-биле республика парламентизиниң ажыл-агыйжы чаа командазы тургустунарынга бүзүрелин илереткен. "Мурнувуста сорулгалар хөй. Бистиң президентивис Владимир Владимирович Путинниң деткээни республиканың социал-экономиктиг хөгжүлдезиниң талазы-биле дыка хөй төлевилелдеривис бар. Чайгылып турар үе чок деп шупту билир бис, ынчангаш ажылдаар апаар – деп, Ховалыг түңнээн.

2019 чылдың сентябрьда соңгуткан Тываның парламентизиниң эрткен чыыжында “Чаңгыс демниг Россиядан” - 30, ЛДПР-ден 2 депутат ажылдаан.

2010 чылдың октябрьда референдум соонда Тывага Дээди Хурал депутаттарын бир дугаар соңгаан, ооң мурнунда ийи палаталыг Улуг Хурал ажылдап турган. Беш партиядан 204 кандидат 2024 чылдың республика парламентизинче депутаттар соңгулдаларда бүрүткеткен.