Тываның Баштыңы республиканың Дээди Хуралының депутаттарының соңгулдаларынга бадылаан

Тываның Баштыңы Владислав Ховалыг республиканың Дээди Хуралының IV чыыжының депутаттарының соңгулдаларынга бодунуң үнүн берген.

Ол Кызылдың 5 дугаар школазында 28 дугаарлыг соңгулда участогунга эртенгиниң 9.00 шакта өг-бүлези-биле келгеш бадылаан.

— Соңгулда дээрге-ле байырлал-дыр. Бис келир үевисти соңгуп турар бис. Бөгүн көөрүмге, соңгукчулар дыка идепкейлиг, өг-бүлелери-биле кээп, бот-боттарынга байыр чедирип соңгуп турар-дыр.

Соңгулдалар мурнунда партиялар болгаш кандидаттар колдуу эки ажылды чорудуп, боттарының саналдарын кылып, чондан чагыгларны ап турду. Бистиң командавыс чондан 50 ажыг муң чагыгларны алган. Ол чагыглар чоннуң программазынче кирер. Ол төлевилелдер чаа составтың депутаттарының кол өзек документизи болур.

Оон аңгыда бөгүн бүдүн республикавыста соңгукчуларывыстың сагыш-сеткили бедик деңнелде, улуг көдүрлүүшкүннүг туруп турар. Чүге дизе неделяның эгезинде ажылчы байдал-биле бистиң Президентивис Владимир Владимирович Путин Тывага келгеш барган болгай. Ол бистиң сайзыраар талазы-биле кол-кол төлевилелдеривисти деткээн. Ынчангаш бөгүн бистиң кол сорулгавыс – чаңгыс кижи-биле дөмей, чаңгыс команда болуп Дээди Хуралдың чаа составының депутаттары-биле мурнувуста турар сорулгаларны күүседири, Президентиниң берген даалгазын күүседир ужурлуг бис. Ол дээрге бөгүнде алган бедик темпилерни ол-ла хевээр оскунмайн, бурунгаар шимчээри — деп, Тываның Баштыңы В. Ховалыг чугаалаан.