Тывага бо улуг-хүнде 106 соңгулда болуп эртер

Сентябрьның 8-те Чаңгыс аай бадылаашкын хүнүнде, республиканың чурттакчы чону Тыва Республиканың Дээди Хуралының (парламентизиниң) дөрткү чыыжының депутаттар соңгулдарынга база муниципалдыг деңнелдиң 105 соңгулдаларынга киржир.

2024 чылдың январь 1-ниң дыңнадыы-биле алырга, Тывада соңгукчуларның ниити саны 206030 кижи. Эртен 182 соңгулда участоктары ажыттынар. Чедери берге беш участок: Бии-Хем кожууннуң Хүтте, Бай-Тайга кожууннуң Кара-Хөлде, Өвүр кожууннуң Сарыг-Хөлде, Эрзин кожуннуң Качыкта база Чөөн-Хемчик кожууннуң Элдиг-Хемде тус черниң соңгукчулары сентябрьның 1-де хуусаадан эрте соңгуп каапканнар.

Тываның 17 муниципалдыг районнар девискээрлеринде чурттап турар 10 муң хире соңгукчу хуусаадан эрте соңгуур эргезин ажыглаан. Тывага хуусаадан эрте соңгулдалар августтуң 22-ден сентябрь 7-ге чедип болуп эрткен.

Соңгулда комиссиязының "СпецУИК" чаа төлевилели-биле хоругдал адаанда хамаатылар бадылаашкынга киришкен. Республиканың Соңгулда комиссиязының доктаалынга даянгаш, Тываның девискээринде хоругдал черлеринде каразыттырган база буруудаттырган кижилер Россия субъектилериниң дээди албан-дужаалдыг кижилерин соңгуур бадылаашкынга киржир кылдыр тускай соңгулда участогун тургускан. Кызыл хоорайның 16 дугаарлыг соңгулда участогунга тускай участок соңгулда комиссиязының бүрүн эргелерин хүлээткен. Кожа регионнардан хоругдал адаанда чыдар кижилер Кызылга бадылаар аргалыг болган.

Оон аңгыда Тываның Соңгулда комиссиязы тускай шериг операциязының зоназынга ажылдаар ийи экстерриториалдыг соңгулда комиссияларын тургускан. Донецк база Луганск Улус Республикаларда Тывадан шериг албанныглар, эмчилер, тудугжулар август 29-тан сентябрь 5-ке чедир республиканың Дээди Хуралының (парламентизиниң) дөрткү чыыжының депутаттар соңгулдаларынга хуусаадан эрте бадылаашкынга киришкен.