Тываның Баштыңы Таңды кожууннуң чурттакчылары-биле ужурашкан

Кызыл - Эрзин оруунуң Бай-Хаакче талазынче автооруктуң 30 км участогун септээринче бир миллиард рубльди салган. Сөөлгү каш чылдарда аңаа септелге ажылдарын чоруткан – ооң мурнунда оңгул-чиңгил берге орукка бөгүнде чорууру таарымчалыг болгаш айыыл чок апарган. Ону тус черниң чурттакчылары-даа, экомаршруттарже азы Чагытай хөлче чоруп турар аян-чорукчулар демдеглеп турар.

Владислав Ховалыг Таңды кожууннуң чурттакчылары-биле ужуражып тургаш, кожуун оруктарының чугула участоктарын эде чаартыр, септээр ажылдарны ам-даа уламчыларын дыңнаткан.

Республиканың удуртукчузу кожууннуң активи-биле ужуражылгада чурттуң президентизи Владимир Путинниң Тывага ажыл-агыйжы чоруун, кандыг социал-экономиктиг айтырыгларны чугаалашканын дамчыткан.

Владислав Ховалыг ол чорааш, Бай-Хаакта тудуп турар 825 олуттуг ниити өөредилге школазының тудуун хынаан. Кызыл агломерациязында туткан школалар ышкаш чаңгыс төлевилел-биле ону тудуп турар. Бөгүнде объект 49 хуу белен. 105 ажылчын, 15 санныг техника тудугда хаара туттунган. Амгы үеде иштики шеверлел, электромонтаж, сантехниктиг болгаш өске-даа ажылдарны чергелештир чорудуп турар. Даштыкы плиталарны эптээр, кырын шывар ажылдар уламчылавышаан.

Күрүне керээзинде айытканы езугаар, чаа школаның ажылдары бо чылдың декабрьда доостур ужурлуг.

«Өөредилге» нацонал төлевилел-биле бо чылын Таңды кожуунда ажыдар ийиги школа болур. Балгазын суурда 616 олуттуг чаа школа сентябрь 2-де ажыттынганын сагындыраал.