07.09.2024
«Бодунуң чедиишкиннери-биле бистиң училищевис бедик статузун бадыткап, өөредилгениң шынары-биле Россияның Камгалал яамызының өөредилге черлериниң аразында үшкү черни ээлеп турар» - деп Тываның Баштыңы социал четкилерде бодунуң блогунда бижээш, бо кыска үениң дургузунда медальдар-биле дооскан 80 оолдар, уругларны ол белеткээнин демдеглээн.
Бөгүн КПКУ-да 400 ажыг оолдар, уруглар өөренип турар, оларның 80-и - кыстар. Оларның аразында тускай шериг операциязынга эрес-дидими-биле амы-тынындан чарылган маадырларның уруглары бар. Кадеттерге инженер-техниктиг, лингвистика болгаш чөөн чүк улустарының спортчу демисел школаларын организастаан. Оолдар, уруглар шериг херээниң арга-мергежилинге өөренип, спорт-биле харылзаалыг болбушаан, бүгү талалыг сайзыралды ап турар. Училищеде дош чуңгу, тир, чиик атлетика стадиону, футбол шөлү, библиотека, номчулга залы, психологтуг суларал болгаш дыштанылга өрээлдери бар.
Кадеттер немелде өөредилгеде ийиги дыл кылдыр чүгле европейжи эвес, чөөн чүк дылдарын өөренип, а программа чогаадырын, робототехника, авиамоделированиени база спорттуң аңгы-аңгы хевирлерин шиңгээдип турар.
Билиглер хүнүнде чурттуң Президентизи Владимир Путинниң өөредилге черинге келгени КПКУ-нуң юбилейинге төөгүлүг улуг болуушкун болганын Владислав Ховалыг демдеглээн. Училищеде Хакасиядан эгелээш Камчаткага чедир Россияның 14 регионундан оолдар өөренип турарын Президентиге илеткээн. Сургуулдар күрүне баштыңынга боттарының эртем ажылдарын таныштырган, Президент улаштыр кайнаар өөренирин сонуургап, чедиишкиннерни күзээн. Силернии ышкаш өөредилге черлерин көргеш, Россияның келир үезинге бүзүрелим улуг деп, Путин демдеглээн.
Президентиниң деткимчези болгаш РФ-тиң Камгалал сайыды Сергей Шойгунуң инициативазы-биле 2014 чылда Кызылдың Президентиниң кадет училищези тургустунганын сагындыраал. Тыва биле Россияның кады демнежилгезиниң 100 чылынга тураскааткан чылда өөредилге чери ажыттынган.