Тес-Хем кожууннуң О-Шынаа суурда чырык четкилерин эде чаарткан

Энергокомпания Тыва Республиканың кыдыг-кызыгаар Тес-Хем кожуунда О-Шынаа суурнуң четкилерин чаартыр ажылдарны дооскан. 198 бажыңныг улуг эвес суурга идегелдиг чырык хандырылгазын бээри-биле энергетиктер комплекстиг улуг ажылды чоруткан: камгалал чок 3,438 км удазынның орнунга агаар бойдустуң өскерлиишкиннеринге тогбас удазыннарны шөйүп, үези эрткен 132 ыяш чагыларны демир-бетон чаа чагыларга солаан.

– «Россети Сибирь Тываэнерго» бүдүрүлгениң ажылдакчылары чагыларны тургузуп, бажыңнарывысче чырыкты киириптерге, бедик сайзыралда келген ышкаш болдувус. Ам хып-өжери читкен, кылган ажылы дээш база чидиг чырыкты кииргени дээш, четтирдивис. Бистиң амыдыралывыс «мооң мурнунда» база «ооң соонда» деп аңгыланы берди – деп, суурнуң чурттакчызы Алдынай Ивановна өөрүшкүзүн үлешкен.

Компанияның башкарыкчы директору Антон Лукин энергетика объектилериниң тудуун боду хынап чораан:

– Ындыг-ла кончуг эскертинмес энергетиктерниң ажылын чон шын сеткили-биле үнелеп турары өөрүнчүг-дүр, ынчалза-даа ооң дүне, хүндүс-даа, хаттыг-чаъстыгда-даа таарымчалыг болгаш эки ажылы чурттакчылардан дыка хамааржыр. Хергелекчилер-биле кады ажылдап, оларның дыңнадыынга үе шаанда чедери – энергокомпанияның ажыл-чорудулгазының эң кол угланыышкыны болур.

Улуг компанияның специалистери энергетика тудуунче киргенден бээр чаа-ла бир ай болза-даа, бөгүнде ажылдар колдуунда доозулган, ам чүгле чырык энергиязының хереглекчилери-биле ырактан ажылдаар арганы магадылаан учет дериг-херекселдерин салыр. Эрги ыяш чагыларны ап кааптар.