Мөңгүн-Тайгага кожууннуң энергетиказын хөгжүдериниң дугайында чугаалашкан

Тываның Чазаа Мөңгүн-Тайга кожуунче чырык шугумун тударын чедип алыр дээш ажылдаар. Тываның Баштыңы Владислав Ховалыг Мөңгүн-Тайгага ажылчын сургакчылаашкын үезинде ону чугаалаан.

Регионнуң удуртукчузу баштаан чазак делегациязы республиканың эң ырак булуңунга ажылчын сургакчылаашкын-биле чораанын сагындыраал. Хыналда ажылдың бирээзи – кожууннуң чырык хандырылгазы болган. Мөңгүн-тайгажыларның бажыңнарынче база социал албан черлеринче чырыкты дизельдиг электростанциядан берип турар. Кожуун төвү Мугур-Аксы суурда бо чылын келген 500 кВт күштүг ийи чырык хандырыкчызы-биле кады шупту беш тургузуг ажылдап турар.

Чырык талазы-биле экижээн-даа болза, келир чылын Кызыл-Хая суурда чаа школаны кожуптар болза, кожууннуң чырык системазынга чүък улгады бээр. Ынчангаш регионнуң удуртукчузу чырык магистралын тудар айтырыг быжып келген деп айыткан.

«Мөңгүн-Тайганың чону-биле ужуражып тура, күзүн Россияның Энергетика яамызынга хурал болуп эртерин дыңнаткан. Аңаа ЛЭП тудуун тударының аргазын сайгарары планнаттынган. Оларның кайы-бирээзин дүргедедирин чедип алыр бис» - деп, Владислав Ховалыг чугаалаан.

Республиканың эрге-чагыргазы дизельдиг чырык станцияларының курлавырын улгаттырар ажылдарны уламчылаар. Мугур-Аксында тургусканы ышкаш күчүлүг станция Кызыл-Хая суурга келир чылда туруптарын Баштың дыңнаткан. Суурда бар ийи дизель-генераторга немей амдыызында 200 кВт-тыг чырык дамчыдыкчызын немей салыр.

Тываның Баштыңының чон-биле ужуражылгазының үезинде хөмүр айтырыы база көдүрүлген. Ылаңгыя Кызыл-Хая суурда ооң өртээ бир тоннада 7 муң рубль чедип турар. Хөмүрнүң өртээн өйлеп-таарыштырар база субсидия бээр арганы өөренип көөр даалганы Тываның Энергетика яамызынга берген.