Тывада частыр бүдүмелдер заводу 200 хире тонна продукцияны бүдүрген

Регион чазааның техниктиг деткимчези-биле «Техмашсервис» компанияның эрткен чылдың ноярьда Тывада ажытканы эмульсиялыг частыр бүдүмелдер кезээ бүдүрер завод ажылын чогумчалыг эгелээн.

«Завод үттеп-чазылдырар ажылдарга ажыглаар эмульсиялыг частыр бүдүмелдерниң чазылбас чүүлдерин үндүрүп турар. Кезектерниң механиктиг аңгылаашкыны кирген сөөлгү технологияларны ажыглап, манавааны частыышкыннарны чайладып, эмульсия бүдүрүлгезиниң айыыл чок чоруун завод хандырар» - деп, Тываның хөгжүлде фондузу тайылбырлаан.

Республиканың Экономиктиг сайзырал болгаш үлетпүр яамызының дыңнатканы болза, 2024 чылдың бирги чартыында завод регионнуң даг-тывыш бүдүрүлгелериниң хереглелинге 192 тонна продукцияны бүдүрген. Республика бюджединче үндүрүг төлевирлери база чыылдалар кылдыр 2 млн 300 муң ажыг рубль акшаны киирген. Бүдүрүлге төлевилел күчүзүнче кире бээрге, ол түң 87 млн рубль ажа бээрин Экономика яамызы санаан.

2023 чылдың мартта, Красноярскиниң экономиктиг шуулганының шөлчүгежинге, Тываның Чазаа биле «Техмашсервис» АН даг ажылдарынга ажыглаар бүдүмелдер бүдүрүлгезин ажыдар дугайында дугуржулганы чарганын сагындыраал. Тываның Баштыңы Владислав Ховалыгның бодалы-биле алырга, заводту ажыдары регионга болбаазырадылга үлетпүрүнде бүдүрүлге хемчээлин улгаттырып, чаа ажылчын олуттарны көвүдедир. Чаа заводтуң ажылы 2035 чылга чедир Сибирьни хөгжүдер Стратегияже кирген Тывада улуг даг-тывыш төлевилелдерин ажылдадып, ону боттандырар.