Владислав Ховалыг Мөңгүн-Тайганың чону-биле ужуражылгазының соонда регионнуң Орук-транспорт яамызынга даалганы берген

Республиканың Баштыңы Владислав Ховалыгның Мөңгүн-Тайга кожууннуң чону-биле ужуражылгазының кол темалары – Тываның ыраккы кожуунунуң инфраструктура айтырыглары болган. Ужуражылгага Мугур-Аксы биле Кызыл-Хая суурларның чурттакчылары киришкен.

Чоннуң көдүрген эң кол айтырыы – автооруктарның багайы. Орук багайындан машина техника бо-ла үрелип каарын хомудап чугаалааннар.

«Мөңгүн-Тайганың бойдус чурумалы чараш-даа болза, аңаа чедери берге» - деп, Владислав Ховалыг чон-биле ужуражылгазының дугайында социал четкилерде бодунуң арынында дыңнаткан. Мөңгүн-тайгажыларның инфраструктурага хамаарыштыр чидиг айтырыгларын шитпирлээр дээш республиканың чазаа ажылдап турарын айыткан. Кожуунче баар Хандагайты – Мугур-Аксы оруун чылдың-на септеп турар. Хөртүкке алзыптар элээн нарын участоктарны бүрүнү-биле септээр дээш ажылдарның хемчээли улгаткан: «Кышкы үеде аргыжылга оруун хөртүк-хардан камгалаар ажылдарны доктаамал кылып турар», - деп, Владислав Ховалыг тайылбырлаан.

Тываның Баштыңы Алтайже оруктуң берге участоктарын негелдеге дүүштүр кылыр ажылдарны келир чылдан бичиилеп эгелээрин дыңнаткан.

Владислав Ховалыгның чон-биле ужуражылгазының бир түңнели – кожууннуң оруктарын ажаап-карактаарының амгы байдалын эде көөрү болган. Республиканың удуртукчузу мөңгүн-тайгажыларның айытканы эң берге участоктарны сооктар дүшпээнде кылыр даалганы регионалдыг орук-транспорт комплекизиниң яамызынга хүлээндирген.