Шагаан-Арыгның ЧЭТ кышка кайы хире беленинге хыналданы кылган

Тываның Баштыңы Владислав Ховалыг Шагаан-Арыгның чылыдылга-энергетика төвү чаа одалга сезонунга кайы хире белеткенип турарын хынаан. Республиканың удуртукчузу тыва регионнуң чидиг айтырыы-биле эки таныш, федералдыг аңгы-аңгы ведомстволарга ажылдаан байлак арга-дуржулгалыг Россияның алдарлыг экономизи Руслан Цаликов-биле кады Улуг-Хем кожууннуң төвүнге четкен.

ЧЭТ-тиң котельнаязы кышка белен деп, Владислав Ховалыг социал четкилерде дыңнаткан. «Шагаан-Арыгга мартта болган онза байдалдың уржуктарын чайладып, регионалдыг чылыг энергетиказының участогун кышка белеткээр дээш улуг күжениишкиннерни салган бис» - деп, демдеглээн. Объектиде дөрт котелду септээнин, суг базыышкынын чедиишкинниг чорутканын баштың чугаалаан. Одалга сезонунда үш котелду ажылдадып эгелээр, бирээзи курлавырга артар.

Ол ышкаш Шагаан-Арыгда 8 мобильдиг котельнаяларның 7-зи белен чурумга хевээр артар. Арткан бир мобильдиг котельнаяны кожазы Чаа-Хөл кожуунда муниципалитеттиң чылыг энергетиказын быжыглаар дээш чоруткан.

Владимир Путин ажыл-агый аайы-биле бистиң регионга кээп чорда, мартта частыышкын болган Шагаан-Арыгның ЧЭТ-инге чаа котельнаяны тудары чугула апарган деп Тываның Баштыңы дыңнатканын сагындыраал. «Россияның тудуг болгаш ЧКА сайыды Ирек Энварович Файзуллинниң база РФ-тиң вице-премьери Марат Шакирзянович Хуснуллинниң ниити удуртулгазы-биле федералдыг яамы-биле кады улуг белеткел ажылдарын кылганын Владимир Владимировичиге чугаалаан мен» - деп, Владислав Ховалыг бижээн.

Республиканың удуртукчузу чаа котельная тудуунга акша-хөреңгини Россия Федерациязының чазааның курлавыр фондузундан аңгылаар арганы көөр дилегни президентиге киирген. Владимир Путин дилеглиг документиге резолюцияны салып, Тываның айтырыын өөренип көргеш, деткиирин Россия Чазааның Даргазының оралакчызы Марат Хуснуллинге онааган.