Тываның Баштыңы Владислав Ховалыг ыраккы Кызыл-Хая суурда школа тудуун хынаан

«Өөредилге» национал төлевилелдиң «Амгы үениң школазы» федералдыг төлевилели-биле спорт залдыг, 176 олуттуг школаны тудуп турар. «Бастион» КХН тудуг организациязы тудугнуң 35 хуузун тудуп үндүрген.

Школа тудуп турар Мөңгүн-Тайга кожуун чедери ырак болгаш берге болганындан тудуг материалдарынга база үе шаанда объектини дужаарынга салдарны чедирген. Ындыг болзажок, Тываның Баштыңы дараазында өөредилге чылында уруглар таарымчалыг болгаш аянныг байдалга өөренип ужурлуг деп дыңнаткан:

«Тудугжулар бо чылын объектиниң кырын бүрүнү-биле дуглаптар планныг. Келир чылда тудуг ажылдарын доозуп, чогуур коммунал инфраструктураны кииргеш, ажылглалче киирер ужурлуг. Келир чылын Билиг хүнүнде оолдар, ургулар чаа парталар артынга олурупкаш, Кызылдың школаларында үе-черлери ышкаш байдалдарга өөренип эгелээрлер» - деп, Владислав Ховалыг хууда блогунда бижээн.

Бөгүнде тудугжулар ханаларны салып, кырын плитка-биле дуглап, эптээр тудар ажылдарда хаара туттунган. Объектде 27 тудугжу, беш санныг техника ажылдап турар.