Тывада ОРВИ база грипптен аарыыры эпидемиологтуг деңнелге четпес

Росхереглелхайгааралының Тывада эргелелиниң дыңнатканы болза, эрткен неделяда республикада ОРВИ база грипптен аарыыр чорук эпидемиологтуг деңнелден 80,6 хуу куду. Беш хонук дургузунда ОРВИ-ден 80 кижи аараарын мониторинг көргүскен.

Гриппке удур дээштиг арга тарыдып алыры деп эмчилер сагындырып турар. Август айда-ла сезоннуг гриппке удур күскү тарылга камнаниязы регионда эгелээн. Эрткен чылда ышкаш, чурттакчы чоннуң 60 хире хуузун, ооң иштинде айыылдыг бөлүкке хамааржыр улустуң 75 хуузун хаара тудары планнаттынган.

COVID-19-тан аараан таварылгалар саны көвүдеп турарын санитар эмчилер демдеглээн. Эрткен недеялның беш хонуунда чаа коранвирус инфекциязындан аараан тос таварылга бүрүткеттинген. Оларның санында 17 хар чедир назылыг алды уруг илереттинген. Үш кижини эмнелгеде чыттырган, алды кижи амбулаторлуг эмнээшкинде.

Тыныштың аарыгларындан аарыыр чорукту болдурбазы-биле социал болгаш өөредилге черлериниң удуртукчуларынга каш арга-сүмени сүмелээн:
- тарымчалыг температура чурумун сагыыр, агаарладыр, агаар арыглаар дериг-херекселдерни ажыглаар;
- эъди изип турар улусту илередири-биле “эртенги шүүрелдени” албан чорудар;
- аарыг нептерээн үеже чон-биле ажылдап турар ажылдакчыларны хууда камгалал чүүлдери-биле хандырар;
- хөй-ниити черлеринге, хөй-ниити транспортунга дезинфекция хемчеглрин чорударын организастаар;
- ажылдакчыларны гриппке удур тарыдарын организастаар.