Владимир Путин Тываның турисчи арга-шыдалы улуг деп демдеглээн

Россияның Президентизи Тываны хөгжүдер перспективтиг бир адыр туризм деп айыткан. Республиканың кайгамчыктыг байлак бойдус чурумалы-биле ону холбап, аян-чорукчулар санын көвүдедир дизе ынаар кичээнгейни углаарын чугаалаан.

«Ындыг болганда аалчылар бажыңнары база дыштанылга бажыңнарының өрээлдер фондузун калбартып, солун турисчи программаларны сүмелээр. Республиканың кайгамчык бот-тускайлаң бойдузун кадагалаарынче, ховар дириг амытаннарын камнаарынче эң улуг кичээнгейни угландырар. Амгы үеде республика база Бойдус яамызы «Тыва» камгалалдыг бойдус девискээринде шак-ла ындыг аттыг национал паркты тургузар ажылды чорудуп турарын билир мен» - деп, Владимир Путин регионнуң социал-экономиктиг хөгжүлде айтырыгларның хуралында демдеглээн.

Тываның аныяктары ачы-дуза адырының шынарын экижидери чугула дээрзин айыткан. 15 дугаар лицейниң 11 классчызы Данна Дулуш республикада туризм төлевилелин деткиирин Владимир Путинден дилээн. Найысылалдың 20 дугаар чаа школазынга Россияның Президентизи өөреникчилер-биле ужурашкаш, “Чугула чүүлдерниң дугайында чугаа” деп ажык кичээлди эрттиргенин сагындыраал.

«Иштики туризмни хөгжүдериниң, хүндүлээчел чоруктуң дыка улуг программалары бисте бар. Иштики туризм дыка дүрген хөгжүп турар. Россияда, Тывада база дыштанып, ону сонуургаан аян-чорукчулар саны каш катап көвүдээн. Ынчангаш бөгүн бүгү-российжи программаның Тывага тураскааткан кезээниң дугайында албан чугаалажып, демдеглээр бис» - деп, Владимир Путин Даннага харыылаан.

Президент Тывага чорааш, республикага аян-чоруктуң чаа сорунзазы - Россияда эң улуг сарыг шажын база өөредилге комплекизи «Тубтен Шедруб Линг» хүрээге чораанын сагындыраал. Эрткен чазын хүрээни ажыткан, ынчан президент шупту чүдүкчүлерге байыр чедирген телеграмманы чоруткан. Бо удаада боду келгеш, хүрээ комплекизин сонуургаан.

Президентиниң дыштаныр ынак черлериниң бирээзинге Тыва хамааржырын демдеглээли. Ол Тывага келгеш тайгага дыштанып, Улуг-Хемнеп салдап, балыктаар чаңчылдыг.