Владимир Путин ажыл-агый аайы-биле Тывага чораан

Кызылда Вавилин ээтпээнде Ада-чурттуң Маадырлары аттыг 20 дугаар чаа ажыттынган школага Президент “Чугула айтырыглар дугайында чугаа” деп ажык кичээлди эрттирген. Күрүне баштыңы чаа өөредилге черин эргий кезип, башкылар-биле ужурашкаш, чаа школада чыглып келген өөреникичилерге байыр чедирген. Доктаамал чаартынып турар бедик российжи негелделерге чаа школа дүгжүп турарын Путин демдеглээн.

"Кызылга дыка эки өөредилге чери-дир – деп, президент үнелелди бергеш, чугаалаан - Силер маңаа чаа эштерни тып, эң кол чүүл – башкыларның амгы негелделер езугаар эрттирер кичээлдеринден солун билиглерни шиңгээдип алырыңар чугаажок".

Владимир Путин өөреникчилер-биле ажык чугаа үезинде, аңгы-аңгы темаларны, ТШО-га Тываның үлүг-хуузун база республиканың чурттакчыларының киржилгезин айыткан:

"Тыва Республикадан 10 муң хире кижи тускай шериг операциязында киржип турар. Боттарының амы-тынын, кадыын, амыдырал-чуртталгазын-даа бодавайн, чонун база бүгү чуртту камгалап турар. Ада-чуртувуска онзагай хамаарылганың болгаш төрээн чуртка ынакшылдың чүс-чүс чылдарда артып каан чайынналчак чижээ-дир" – деп, президент демдеглээн.

Владимир Путин ооң ажыл-амыдыралын сонуургаан уругларның айтырыгларынга харыылап, бодунуң планнары-биле үлешкен. Бир школачы оол "мотоциклге акша чыыр күзелин" президент-биле үлешкен. Президент квадроцикл транспорттуң айыылдыг хевири-дир деп айыткаш, машинаже чыып алырын сүмелээн. Путин база бир айтырыгга харыылап тура, кандыг чижекти өттүнүп болбазын чугаалаан:

"Бо үлегерни менден өттүнмес. Бөгүн каш шак удаан деп мен? – дөрт шак. Ол эвээш. Анаада алды шак удуур мен. А сен, эвээш дизе сес шак удуур ужурлуг сен. Доктаамал хөй шимчеп турар кижи, бодун эки байдалга тудар, мен база эки болур ужурлуг мен".

Россияның Президентизи Тывага анаа-ла келбээнин чугаалаан: бо чылын бистиң республика Россияның составынче эки тура-биле каттышканының 80 чылын демдеглээр. Күрүне баштыңы Тываның социал-экономиктиг хөгжүлде айтырыгларның талазы-биле хуралды эрттирип, регионнуң баштыңы Владислав Ховалыг-биле аңгы ужурашкан. Оон аңгыда Владимир Путин "Тубтен Шедруб Линг" сарыг шажын хүрээзинге четкен.  Президентиниң ажыл-агыйжы сургакчылаашкыны Моолче албан езузу-биле уламчылаар. Владимир Путин аңаа баргаш, совет болгаш моол шериглерниң Халхин-Гол хемге япон милитаристерни чылча шапканының 85 чылын демдеглээн хемчеглерге киржир.