Сентябрь 2-де Тывада ийи чаа школа ажыттынган

Тываның Өөредилге яамызы 72 муң уруглар, ооң санында 7,5 муң биргиклассчылар , 4,5 муң биргикурчулар, 5 муң хире чаштар чаа өөредилге чылынга турскааткан хемчеглерге киржип, бирги кичээлдерин эрттиргенин дыңнаткан.

Тываның Баштыңы Владислав Ховалыг байырлал хүнү таварыштыр өөреникчилерге болгаш оларның ада-иелеринге, ол ышкаш башкыларга видео таварыштыр байырын дамчыткан: «Билиглер хүнү-биле, чаа өөредилге чылының эгези-биле сеткилим ханызындан байыр чедирип тур мен! Шуптуңарга чогаадыкчы чедиишкиннерни база өөрүшкү-маңнайны күзедим! Билиглер чуртунче аян-чорук солун болгаш чүгле эки демдектерни эккээр болзун» - деп, регионнуң удуртукчузу чугаалаан.

Чаа өөредилге чылында республикада - Балгазында база Вавилин ээтпээнде ийи школа хары угда ажыттынган. Ол өөредилге черлерин «Өөредилге» национал төлевилел-биле туткан.

Балгазын школазы 616 уругга санаттынган. Школа директору Чаяна Оюннуң дыңнатканы болза, башкылар командазы чыгдынган, хостуг олуттар чок. Бо хүнде школа 610 өөреникчини хүлээп алган. 59 бирги классчыларны үш класска хувааган. Школа чурагайлыг хоорай хүрээлелиниң ийи өрээлин база «Өзүлде точкаларының» дөрт шөлчүгежин ажыткан. 300 олуттуг улуг зал, ийи спорт залы база стадионнуг.

Өөредилге чылының эгезинде терроржу кыжаныг база агаардан айыыл-халап үезинде хөделириниң бүгү-российжи өөредилгелери эртер. Школалар база техникумнарда дыңнадылга системаларын хынаан, камгалал албаны биле коллективтиң оперативтиг албаннар-биле кады ажылдажылгазынга өөредилгени эрттирген.

Бо чылын чаа өөредилге чылының бирги хонуу улуг-хүнде таваржы бергени-биле, шупту өөредилге черлеринге байырлыг чыскаалдарны база баштайгы коңгаларны сентябрь 2-де этсип, эрттирген.