Тывада “Школаже белеткениринге дузалаш” ачы-буян акциязының түңнелдерин үндүрген

Чылдың-на өөредилге чылының эгезинде ажылчын коллективтер, хууда сайгарлыкчылар болгаш республиканың буянныг хамаатылары «Школаже белеткениринге дузалажыр» акцияга каттыжып келир чаңчыл апарган. Акция хөй ажы-төлдүг болгаш чединмес өг-бүлелерниң база амыдыралдың берге байдалдарынга таварышкан өг-бүлелерниң ажы-төлүнге чаа өөредилге чылынга белеткениринге дузалажып турар.

Август 1-де эгелээн ачы-буян чыыр пунктулар бөгүн ажылын дооскан. Бүгү республикада организациялар болгаш ведомстволар, хөй-ниити каттыжыышкыннары, чазакэрге-чагарга төлээлери, аңгы-аңгы шимчээшкиннерниң идепкейжилери болгаш сагыш човаачал хамаатылар бир айның дургузунда буянныг акцияга киришкен.

Ачы-буян дузазын 2800 хире ажы-төлдү азырап турар 1453 өг-бүле алган, ооң иштинде тускай шериг операциязының киржикчилериниң өг-бүлелеринден 237 уруг.

Сентябрь 1-ге чедир ачы-буян дузалачызын үлээр, ында хереглелдиг өг-бүлелерег эргежок чугула өөредилге барааннары – канцеляр херекселдери, номнар, идик-хеп, чүктээр сумкалар ​​кирип турар.