Владислав Ховалыг Александр Лукашенконуң юбилейи-биле байыр чедирген

Тываның Баштыңы Владислав Ховалыг Беларусь Республиканың Президентизи, Күрүне эвилелиниң күрүне чөвүлелиниң даргазы Александр Лукашенконуң 70 харлаан юбилейи-биле байырын чедирген. Беларусь күрүнениң баштыңының адынче байыр чедириишкинниг телеграмманы Тывадан чоруткан:

«Юбилейиңер таварыштыр сеткилим ханызындан байыр чедириишкинин хүлээп ап көрүңер! Силерниң бедик мергежилиңер, башкарыкчы салым-чаяаныңар, улуг политиктиг арга-дуржулгаңар болгаш ат-алдарыңар, Беларусь Республиканың сонуургалдарын камгалаар талазы-биле быжыг болгаш турум туружуңар, Ада-чуртуңарга ынакшылыңар чүгле чаңгыс чер-чурттугларыңарның эвес, а орус чоннарның, ооң иштинде Россияның болгаш Тыва Республиканың чурттакчыларының аразынга улуг үнелелди болгаш хүндүткелди болдурган.

Силерниң эртем-техниктиг, инновастыг болгаш үлетпүр күчү-күжүнге даянган угланыышкыныңар-биле Белорусь чедиишкинниг сайзырап турарын бодум көөр аргалыг болдум. Бистиң ужуражылгавысты, Силерниң чылыг-чымчак хүлээп алыышкыныңарны, республиканың мурнакчы үлетпүр бүдүрүлгелеринче аалдап чораанывысты улуг өөрүшкү-биле сактып чор мен» - деп, байыр чедириишкининде бижээн.

Тываның Баштыңы Александр Григорьевичиге быжыг кадыкшылды, аас-кежикти болгаш өөрүшкүнү күзээш, Беларусьтуң лидери бо чоокку үеде Тывага келир боор дээн идегелин илереткен.

Ийи республикаларның аразында харылзаа 2021 чылда Беларусь Республиканың делегациязы ажыл-агый аайы-биле Тывага кээп чораан үеден эгелээнин сагындыраал. 2022 чылдың январьда Тыва Республиканың делегациязы Беларусь Республикага харыылап четкен. Ол ынчан Беларусьтуң Президентизи Александр Лукашенко база Гродно облазының күүсекчи комитединиң даргазы Владимир Караник-биле ужуражылгалар болуп эрткен.

2023 чылдың июньда, Уфага эрткен Россия регионнарының база Беларусьтуң шуулган шөлдеринге, Тыва Республиканың Чазаа биле Беларусь Республика аразында садыг-экономиктиг, эртем-техниктиг болгаш социал-культурлуг кады ажылдажылга Дугуржулгазын чарганнар.

2021 чылга деңнээрге 2023 чылда Тыва Республика биле Беларусь Республиканың аразында бараан садып-саарылгазы 9 катап улгадып, 56 муң доллар четкен (2021 ч – 6,2 муң доллар). Тываның даштыкы экономиктиг харылзаалар агентилелиниң дыңнатканы болза, чиик үлетпүр барааннарының импорту өзүлдениң кол көргүзүү болган.