Тываның Баштыңы Шолбан Кара - оол Татарстанга болган халапка кажыыдалын илереткен

“Казаньда коргунчуг халап болган! Амы - тынындан чарылганнарның чоок болгаш төрел кижилеринге кажыыдалды Тыва Республиканың бүгү чурттакчыларының өмүнээзинден илередип тур бис. Улуг оглун чидирген адага, мээң коллегамга, Татарстанның Баштыңы Рустам Нургалиевич Миннихановка кажыыдалдың онза сөстерин илереттим” - деп, Тываның Баштыңы Шолбан Кара - оол социал четкиге бижээн. “Татарстан” авиакомпанияның 363 дугаар рейизин күүседип чораан, бортунда 44 пассажирлиг, 6 экипаж кежигүннерлиг “Боинг 737” деп самолет Москваның “Домодедово”  аэропортундан ужуп үнгеш, Казань хоорайның аэропортунга хонуп бар чорааш, ужудуп үнер - хонар шөлге ноябрь 17 - де 19.26 минута турда кээп дүшкен болгаш өртени берген. Бортка чораан пассажирлер болгаш экипаж кежигүннери шупту амы - тынындан чарылган, чаңгыс - даа кижи дириг артпаан. Информация  агентилелиниң дыңнатканы - биле алырга, ол халапка Татарстанның Президентизиниң улуг оглу Ирек Минниханов, Айыыл чок чоруктуң федералдыг албанның Татарстан талазы - биле эргелелдиң удуртукчузу Александар Антонов база аңаа чораан.

    Казаньга болган авиахалаптың чылдагаанын тодарадырының талазы - биле комиссияны дораан тургузарын Россияның Президентизи Владимир Путин Чазакка дааскан. Тус - тус яамыларга болгаш ведомстволарга дилээшкин - камгалал хемчеглерин дарый алыр даалганы берген. Ол коргунчуг халапка амызындан чарылганнарның төрел болгаш чоок кижилеринге ханы кажыыдалын Владимир Путин илереткен. Күрүнениң баштыңы Татарстанның Президентизи Рустам Миннихановче боду долгааш база кажыыдалды илереткен.

    Россияның Чазааның Даргазы Дмитрий Медведев Казаньга болган халапка амы - тынындан чарылганнарның чоок болгаш төрел кижилеринге ханы кажыыдалын илереткен. Самолеттуң аңдарылган чылдагаанын тодарадыр талазы - биле комиссияны тургузарын болгаш баштаарын транспорт сайыды Максим Соколовка ол дааскан.

Ноябрьның 18 - тиң хүнүн Татарстанга кажыыдал хүнү кылдыр чарлаан.