Тывага Төп Азия чоннарының төөгү-культурлуг өнчү салгалының талазы-биле бүгү-российжи эртем-практиктиг конференция болуп эртер

Ноябрьның 14 база 15 хүннеринде Тыва үндезин культура төвүнге, «XXI чүс чылда Төп Азия чоннарының төөгү-культурлуг өнчү салгалы: шинчилели, документ долдурулгазы база адаптация аргалары» деп темага бүгү-российжи эртем-практиктиг конференция болуп эртер. Аңаа киржир кылдыр Төп Азия чоннарының үндезин культура адырының шинчилекчилерин, эртемденнерни, башкыларны, юристер, политиологтарны, специалистерни чалаан.

Конференция ССРЭ-ниң составынче ТАР-ның эки тура-биле каттыжып киргениниң 80 чылынга база республиканың күрүне болгаш политиктиг ажылдакчызы Вячеслав Кууларович Даржаның 65 харлаан хүнүнге тураскаадып эртер.

Вячеслав Даржа – тыва чоннуң үндезин культуразын шинчилээринге, чурумчударынга база нептередиринге улуг рольду ойнаан онзагай кижи. Ооң эртем-нептереңгей ажылдары бо хүнге чедир улуг сонуургалды болдурганы-биле тыва үндезин культура шинчилекчилериниң база нептередикчилеринге солун тема болуп артпышаан.

Вячеслав Даржаның ажыл-чорудулгазының, ооң шинчилелдериниң ужур-утказының, амгы чаартылгалыг үеде Төп Азия чоннарының дылын болгаш аас чогаалын шинчилээр чугула айтырыглар дугайында чеди аңгы темалыг угланыышкыннарны сайгарып чугаалажыр.

Ол ышкаш өөредилгениң этнокультурлуг утказының талазы-биле айтырыгларны чугаалажыр этнопедагогтар школазын организастаар. Школаның ажылынче этнопедагогтарны, Россияның чоннарының аас чогаал, башкылаашкын, үндезин культуразының айтырыглары-биле ажылдап чоруур аныяк шинчилекчилерни, аспирантыларны, магистрантыларны чалаан.

Конференцияның программазын болгаш секцияларын тургузарынга, сентябрь 15-ке чедир киржириниң дугайында чагыгны долдургаш, ctyva@yandex.ru электроннуг почтаже чорударын организаторлар сагындырып тур.

Шупту айтырыглар талазы-биле дараазында электроннуг адресче бижиир: ctyva@yandex.ru азы телефонче долгаар: +79293584417, +73942224614 – Чолдак-оол Шончалай Валерьевна