Тываның Чазаанга келир кышка одалга белеткелин чугаалашкан

Республика Баштыңы Владислав Ховалыгның даргалаашкыны-биле эрткен хуралга Тыва Республика Чазааның даргазының оралакчылары, кожуун чагырга даргалары, күүсекчи эрге-чагырганың федералдыг болгаш республика органнарының удуртукчулары киришкен.

Регионалдыг Одалга-энергетика яамызының медээзи-биле алырга, социал болгаш чуртталга объектилери кышка 80 хуу белен болгаш график езугаар ажылдарны кылган:
• ЧЭК – 68 % («Россети Тываэнерго» АН, «Кызылская ТЭЦ» АН, ТР-ниң КУБ «ТЭК-4 БК», котельнаялар, «Дизель» КХН)
• ЧКА – 87 % (чуртталга фондузу, суг-хандырылга черлери)
• Социал адыр объектилери – 87 %.

Социал адыр объектилеринден Өөредилге яамызының албан черлериниң кышка белеткели 100, а Кадык камгалал, Күш-ажыл болгаш Социал политика, Культура яамылары 64 хуу белен.

Одалга сезонунга белеткенир кол ажылдарының бирээзи – озал-ондакка удур шенелделер болур. Барыын-Хемчик, Улуг-Хем, Кызыл, Бии-Хем, Каа-Хем, Чөөн-Хемчик кожууннарның чылыг хандырар организациялары өөредиглиг профилактика хемчеглерин чоруткан болза, Чеди-Хөл, Чаа-Хөл, Таңды кожууннар, Кызыл база Ак-Довурак хоорайлар аварийлиг байдалды болдурбазының шенелде хемчеглерин эрттирбээн.

Муниципалдыг тургузугларже 117 муң тонна хөмүрнү сөөртүр планның 37 муң тонназын бо хүнге чедир чедирген. Бо чылдың декабрьга чедир хөмүр-дашты сөөртүп чедирер ужурлуг.

Республикада 39 одалга складтары ажылдап турар, оларның 13-ү күрүнении, 26-зы – хууда бүдүрүлгелер. Хөмүр шыгжаар черлер деңзилер база дүжүрер-чүдүрер техника-биле хандыртынган. Бо хүнде складтарда 160 хире тонна хөмүр бар.

Тываның Баштыңы Владислав Ховалыг сан-чурагайлыг медээлерге даянгаш, элээн даалгаларны берген.

Владислав Ховалыг Тываның Кадык камгалал, Өөредилге, Спорт, Культура яамыларынга боттарының удуртулгазындан объектилерниң кышка беленининиң паспорттарын үе шаанда алырын хандырар даалганы берген.

«Тываның Кадык камгалал, Өөредилге, Күш-ажыл база Культура яамылары боттарының башкарылгазында объектилерниң кышка белениниң паспорттарын үе шаанда алырын хандырар. Ол хөй аалдыг каът бажыңнарга база хамааржыр. Муниципалитеттерниң, Чуртталга-коммунал ажыл-агый яамызының база Күрүнениң чуртталга инспекция албанының талазындан башкарыкчы компанияларның ажылынга контрольду күштелдирер» - деп, Тываның Баштыңы сагындырган.

Ол ышкаш кожууннарже хөмүр сөөртүлгезин контрольдап, ол ышкаш «социал хөмүрнү» деткип, базыышкынныг шенелделерни чорудуп, 2024/25 чылыг-хандырылга база чылыг четки организацияларының одалга сезонунга белениниң паспорттарын долдурар комиссияның хыналдаларын база хүлээп алыышкыннарын дарый доозары чугула.