Августуң сөөлгү улуг-хүнүнде бүгү чурт эң хүндүткелдиг профессионал байырлал – Шахтер хүнүн демдеглеп эрттирген

Тываның Баштыңы Владислав Ховалыг республиканың даг-тывыш адырының ажылдакчыларынга байыр чедирген. «Силерниң чымыштыг ажыл-ижиңерге, күш-ажылыңарга бердинген чорууңарның ачызында бистиң республиканың хөмүр-даш казар адыры сайзырап, ооң экономиктиг болгаш бүдүрүкчү күш-шыдалы улам сайзыраан. Тываның социал-экономиктиг хөгжүлдезинге киирген күш-ажылыңарны бедии-биле үнелеп тур мен. Силерге быжыг кадыкшылды, тайбыңны болгаш чаагай чолду күзедим!» – деп, Тываның Баштыңы бодунуң блогунда бижээн.

Владислав Ховалыг хөй чылдарда чурттуң мурнакчы хөмүр-даш төвү – Кузбассты удуртуп чораан Россияның энергетика сайыды Сергей Цивилевке, Луганск Арат Республиканың Свердловск муниципалдыг районунуң даргазы Андрей Сухачевка байырын аңгы чедирген. «Донбасстың күш-ажылчы чедиишкиннери бистиң улуг чуртувустуң төөгүзүнде эң-не чырык арыннарның бирээзи» – деп, Владислав Ховалыг демдеглээн.

Профессионал байырлалдың бүдүүзүнде Тываның чазаа хөмүр-тывыш ажыл-агыйының ажылчыннарынга күрүне шаңналдарын тывыскан.

Республиканың ийи муң хире чурттакчыларын ажылга хаара тудуп турар хөмүр-даш бүдүрүлгези Тываның экономиказының хөгжүлдезинге улуг үлүг-хуузун киирип турар. Бо хүнде хөмүр-даш казып тывары-биле ийи компания – Тываның даг-руда компаниязы биле «Межегейхөмүр» ажылдап турар. Олар бүдүн республикавыстың хереглелинге дээш бедик шынарлыг хөмүр-дашты казып тып, хандырып турар.

«Тываның даг-руда компаниязы» кызыгаарлаттынган харыысалгалыг ниитилелдиң дараазында ажылдакчыларынга хөмүр үлетпүрүнге хөй чылдарда ак сеткилдиг күш-ажылы, бедик мергежили болгаш улуг үлүг-хуузу дээш Тываның Баштыңының Өөрүп четтириишкинин тывыскан:

Евгений Монгушка – Чадаананың автотранспорт участогунуң БелАЗ автомобильдиң чолаачызы,

Тумер Ооржакка – Чадаананың автотранспорт участогунуң чүдүрер машина чолаачызы,

Геннадий Роговка – МАЗ автомашина чолаачызы,

Аяс Холдуйга – Чадаана участогунуң энергетиги,

Екатерина Изместьевага – чылыг хандырылга болгаш инженер четкилер участогунуң химиктиг суг арыглаар аппарат башкарыкчы.