Аржаан суурда Тиилелге шөлүн национал төлевилелдер күрүне программазы-биле септеп турар

Бо чылын «Чурттаар оран-сава болгаш хоорай хүрээлеңи» президентиниң национал төлевилелиниң «Таарымчалыг хоорай хүрээлеңин тургузары» күрүне программазы-биле Тывада 30 дыштанылга черлери – хөй-ниити садтары, парктар, стадионнар, хоорай болгаш көдээ шөлдер, Тиилелгениң тураскаалдары, уруглар болгаш спорт шөлдерин тудуп турар.

Объектилер эрткен чылын бүгү-российжи бадылаашкынга тиилекчилер болганын сагындыраал. Объектилерде амгы үеде тудуг ажылдары кидин түлүк. Регионалдыг Тудуг яамызының дыңнатканы-биле алырга, тудугларның белени 83 хуу. Тиилекчи 17 төлевилелниң ажылдары доозулган, оларның бирээзинге Бии-Хем кожууннуң Аржаан суурда Тиилелге шөлү хамааржыр. Тураскаалды эрткен чүс чылдың 60 чылдарда-ла ажыткан турган.

«Шөлде ажылды барык доостувус, чүгле чырык киирип, бок төгер савалар база сандайлар тургузары арткан. Чылдың-на тураскаалды боттарывыстың күжүвүс-биле чурумчудуп турар бис. Ынчалза-даа 60 ажыг чылдар иштинде ол дыка элээн турду, бүрүнү-биле септеп чаарткан соонда, ол хевир кирген. Ам суурнуң төп кезээ чараш, аянныг апарган. Суур чону идепкейлиг киржип, ажылды шынарлыг кылган» - деп, сумунуң баштыңы Аржаан Буян Байкара чугаалаан.

Бо чылын объектилер шилилгезинде Тыва Россияда мурнакчыларның санынче кирген. https://za-gorodsreda.ru/ платформада бадылаашкынга республиканың 160 муң ажыг чурттакчылары киришкен. Россияның Тудуг яамызының 2025 чылда боттандырар федералдыг төлевилелин ажылдап кылганының соонда, шилилге түңнелдеринге даянып тиилээн хөй-ниити дыштанылга черлериниң төлевилелдери билдинип кээр.