Тываның Баштыңы «Хандагайты» эрттирилге пунктузунда эде чаартылга ажылдары кайы хире чоруп турарын хынаан

Август 22-де Тываның Баштыңы Владислав Ховалыг хөй талалыг хевирге ажылдаарынга херек инфраструктураны тудуп турар Моол-биле кызыгаарда “Хандагайты” эрттирилге пунктузунда эде чаартылга ажылдарын хынаан.

«Эптеп салыр материалдардан тудуг ажылдары доозулган. Кол тудуг объектилерин тудуп турар. Суг хандырылгазы болгаш канализация системаларын тудар ажылдар адакталган» - деп, Владислав Ховалыг бодунуң блогунда бижээн.

Регионнуң баштыңы ол чорааш, ажылдың бирги чадазын дүрген доозар дээш, амгы үеде тургустунуп келген берге айтырыгларны болгаш оларны шиитпирлээр эң-не таарымчалыг аргаларны тускай яамылар болгаш тудугжулар-биле сайгарып чугаалашкан. Дараазында чадада эрттирилге пунктузунга санитарлыг карантин пунктузун болгаш чорук кижилеринге көрдүнген тудугнуң чаартылгазынче кирер.

«Сибирьден Моолче болгаш Кыдатче Тываны таварты транспорт коридорун тургузарының кол чылдагааны – Хандагайты эрттирилге пунктузун хөй талалыг чурум-биле ажылдадып эгелээри болур» - деп, Владислав Ховалыг онзалап демдеглээн. Кыдат болгаш моол партнерларның талазындан ол төлевилелге сонуургал болгаш баш бурунгаар санаан экономиктиг салдар – Тывага-даа, Сибирьге-даа сайгарлыкчы ажыл-чорудулгага чаа идигни бээр деп ол демдеглээн.

«Россия Федерациязының күрүне кызыгаары» деп федералдыг тускай сорулгалыг программа езугаар “Хандагайты-Боршоо” эрттирилге пунктузун чаартыр ажылдар 2022 чылда эгелээн дээрзин сагындыраал. Хемчеглерни эгелээниниң чылдагааны – Моолдуң талазындан “Урумчи (Кыдат) – Ховд (Моол) – Улангом (Моол) – Хандагайты (Россия)” деп чурттар аразында автооруктуң Моол талазында тудуун доозуп, Боршоо эрттирилге пунктузунга делегей чергелиг эрге байдалы тывысканында.

“Хандагайты” эрттирилге пунктузу чаартылга соонда хүн-дүн дивес ажылдаар чурумче шилчип, ооң эрттирилге күчүзү ийи катап көвүдээр. Чүък машиналарынга виза долдурар үе элээн кызырлып, хамаатылар кызыгаар кежер чөпшээрелди үр манавас апаар.