Тывада күрүне байырлалынга тураскааткан хемчеглер болуп турар

Тывада Россия Федерациязының Күрүне тугунуң хүнү Чазак бажыңының баарында шөлде российжи триколор - тук көдүрүүшкүнүнден эгелээн.

Ук хемчегге Тываның Баштыңы Владислав Ховалыг, Дээди Хуралдың даргазы Кан-оол Даваа, чазак кежигүннери болгаш депутаттар, яамылар болгаш ведомстволарның удуртукчулары киришкен.

Бичии хамаатыларга бирги паспорттар тыпсыры – байырлыг хемчегниң каасталгазы болган. Найысылал школаларының тос өөреникчизи регионнуң удуртукчузундан бирги документизин ап, чагыг-сөзүн дыңнаан.

Бүгү чуртта бөгүн күрүнениң ыдык демдээнге болгаш байырлалдың ужур-утказынга тураскааткан патриотчу акциялар, темалыг шактар, чырыдыышкын лекциялары эртип турар.

Национал музей «Россияның күрүне символдары» фотоделгелгени, К.И. Чуковский аттыг Тываның уруглар библиотеказы видеофильмни көргүскен болза, уругларның кадыкшылга лагерьлеринге база хоочуннар бажыңнарынга темалыг беседаларны чоруткан.
Бертен Кызылга төптен Дөгээ даанче туктар туткан байырлалдың автоколонназын көрүп болур турган. Аңаа 30 автомобиль киришкен. Улаштыр Дөгээ даанга Россияның Күрүне тугун киискиткен.
А Арбат шөлүнге байырлал концертиниң үезинде үш өңнүг кожааларны үлээн.