Владислав Ховалыг Тываның чурттакчыларынга Россияның күрүне тугунуң хүнү-биле байыр чедирген

Тываның Баштыңы Владислав Ховалыг Россия Федерациязының Күрүне тугунуң хүнү-биле республиканың чурттакчыларынга болгаш аалчыларынга байырны чедирген.

«Российжи үш өңнүг өң – бистиң чуртувустуң хөй националдыг чонунуң чаңгыс деминиң, бистиң күзел-соруувусту каңнаан төөгүнүң болгаш алдарлыг болуушкуннарның демдээ» - деп, Владислав Ховалыг социал четкилерде байыр чедириишкининде демдеглээн. Бо чылын республика ССРЭ-ниң составынче эки тура-биле каттыжып киргенинден бээр 80 чыл оюн демдеглеп турда, ол байырлал онзагай ужур-уткалыг болуп турарын айыткан.

Россияның Күрүне тугунуң хүнү – албан езузунуң байырлалы. Ол 30 чыл бурунгаар чурттуң Президентизиниң чарлыы-биле тургустунган болгаш чылдың-на август 22-де демдеглеп турар.

Кызыл хоорайның Арат шөлүнде чурттуң болгаш регионнуң күрүне туктарын байырлалга тураскаадып, байырлыы-биле көдүрген. Байырлал езулалынга республиканың Баштыңы Владислав Ховалыг, ооң оралакчылары, Тыва Республиканың Дээди Хуралының даргазы Каң-оол Даваа, ол ышкаш республиканың эрге-хоойлу камгалаар албан черлериниң удуртукчулары болгаш ажылдакчылары база шериг кезектериниң албан хаакчылары киришкен.

Ол ышкаш республика Баштыңы болгаш Тываның парламентизиниң даргазы аныяк хамаатыларга баштайгы паспорттарны тывыскан. Владислав Ховалыг оларга ёзулуг патриоттар болурун, төрээн чери оларга чоргаарланыр кылдыр күзелдерин боттандырып, боттарын төлептиг көргүзерин күзээн.