Тывада "Айыыл чок болгаш шынарлыг оруктар" национал төлевилел-биле көвүрүглер септелгези уламчылавышаан

2024 чылда республикада «Сарыг-Сеп – Балгазын» автомобиль оруунда Бүрен хемни база «Хандагайты – Мугур-Аксы» оруунда Теректиг хемни кежир көвүрүглерни септеп турар. «Айыыл чок болгаш шынарлыг оруктар» национал төлевилел чорудуу-биле чылдың-на 30 ажыг метр көвүрүглер тудуун септеп турар.

Сөөлгү үш чылда чедиишкинниг боттандырган чугула төлевилелдерниң аразында:
- Тожу кожуунга Бии-Хем хемни кежир көвүрүг тудуу;
- Барыын-Хемчик кожууннуң Аяңгаты хемниң көвүрүүнге аварийлиг катап тургузуушкун ажылдары;
- Мөңгүн-Тайга кожууннуң Барлык хемниң көвүрүг кежилдир черинге аварийлиг септелге ажылы хамааржыр.

Оон аңгыда, Тываның Баштыңы Владислав Ховалыгның эгелээни “Улусчу көвүрүг” губернатор төлевилелин боттандырып, тус чер чурттакчыларының күжү-биле кожууннарда ниитизи-биле 300 метр ажыг 14 көвүрүгнү туткан. Төлевилел бир дугаарында ыраккы одар-белчиирлиг болгаш турлагларның малчыннарның аргыжылгазын экижидеринге дузалаан.

2025 чылда Саглы хемни кежир көвүрүг тудары планнаттынган. Ооң төлевилел-смета документилерин ажылдап дооскан. Баш бурунгаар санаашкыннардан алырга, чаа тудугнуң узуну чоокшулай бээр оруу-биле кады 700 метрден ажа бээр, а көвүрүгнүң боду 40 метр, калбаа 6 метр болур.