Тываның Баштыңы Владислав Ховалыг Чаа-Хөлде котельнаяның кышка белеткелин хынаан

Тываның Баштыңы Владислав Ховалыг келир одалга сезонунга Чаа-Хөл кожууннуң белеткелин хынаан. Ажылчы сургакчылаашкын үезинде кожуун төвүнде ЧЭК-4 БК Чаа-Хөл участогунга четкен. Ам ында септелге ажылдары чоруп турар.

«Одалга сезонунга регионнуң чылыг энергетика системазының шупту белдирлерин үезинде белеткээр херек» - деп, ол сургакчылаашкын соонда бодунуң блогунда демдеглээн.

Күскү-кышкы үеже котельнаяны белеткээр план езугаар объектиде элээн каш септелге ажылдары чоруп турар, ынаар 15 млн 900 муң хире рубльди тускайлаан.

«Ийи котел белен – деп, Владислав Ховалыг дыңнаткан. – Бирээзин эрткен чылын тургускан. Хыналданы чоруткан, ажылдап турар. Бо белеткел кампаниязының үезинде ийиги котелду септээн. Үшкү котелду адыргаш, Кызылда капитал септелгеже дужааган».

Оон аңгыда эрги хоолайны база адырган. Ооң орнунга бедии 30 м, долгандырыы 1,2 метр чаа хоолайны тургузар. Ийи котел агрегаттарның колоснигин солаан. Ол ышкаш суг каргаанга удур АЭА-350 деп аппаратты саткаш, салган».

Чаа-Чөлдүң котельнаязы суурнуң чеди социал албан черлерин: Чаа-Хөлдүң ТКБ, школазы, ийи уруглар садын, уругларның уран чүүл школазын, элээди оолдарның спорт школазын база кожууннуң Культура бажыңын чылыг-биле хандырып турар. Бөгүнде котельнаяның складында 72 тонна хөмүр курлавыры бар.

Владислав Ховалыг ол чорааш, тус черниң чурттакчылары-биле ужуражып, оларның айтырыгларын, санал-оналдарын, күзээшкиннерин хүлээп алган.

Регионнуң Баштыңы кожууннуң өске-даа объектилерин эргээн. Республиканың шупту кожууннары дег,Чаа-Хөл регионалдыг болгаш федерадыг төлевилелдерде киржип, социал инфраструктуразын чаартып, хөгжүп турар. Бо хүнде «Көдээ черлерниң комплекстиг хөгжүлдези» күрүне программазы-биле даштыкы дыл башкызынга албан бажыңы – 90 дөрбелчин метр шөлдүг чуртталга оран-савазын тудуп дооскан.

Бир чыл бурунгаар Чаа-Хөл школазында психолог башкыны база шак-ла ынчаар чурттаар оран-сава-биле хандырган. Ол-ла күрүне төлевилелдериниң шугуму-биле эрткен чылын суурнуң кудумчу чырыдылгазын чаарткан, Чаа-Хөл школазын болгаш кожууннуң төп эмнелгезиниң уруглар салбырын бүрүнү-биле септээн.

Чаа-Хөл кожууннуң Ак-Дуруг суурнуң Культура бажыңын септеп чаартып, уруглар ойнаар спортчу шөлдү тудуп, Кош-Ой хемни кежир көвүрүгнү септээн. Булуң-терекчилерге “Эзирлер уязы” төлевилел-биле бичии спорт залын туткан, ол ышкаш ниити билиг школазын септеп-селээн.