Тываның школаларының чаа өөредилге чылынга белеткели адакталган

Тываның Чазааның даргазының оралакчызы Айдыс Сынааның удуртканы комиссия хуралынга чаа өөредилге чылынга өөредилге черлериниң белеткелин сайгарып чугаалашкан.

Өөредилге сайыдының хүлээлгезин күүседип турар Елена Самбала ол талазы-биле ажылын илеткээн. Регионалдыг Өөредилге яамызының дыңнатканы болза, чаа өөредилге чылынга белеткел ажылдары доозулгалак. Шупту өөредилге черлеринде агар септелгелерни кылган.

«Өөредилгениң школа системаларын модернизастаары» программа-биле алды школада капитал септелгени чоруткан. Тээли, Хөндергей, Эрзин суурларда объектилерни, Сукпак суурда аграрлыг лицей-интернатты, кулаа дыңнавас уруглар школа-интернадын база Кызыл хоорайның 4 дугаар школазын септеп турар. «Көдээ девискээрлерниң комплекстиг хөгжүлдези» программа күүселдези-биле Сарыг-Сеп суурда «Родничок» уруглар садын чаартып септээн.

Шупту школаларның дээвиирлерин, шалаларын, одалга болгаш суг хандырылга системаларын солаан. Чырык удазыннарын болгаш айыыл чок чорук системазын эптеп тургускан. Иштики өреэлдерде плиткаларны чадып, ханаларын болгаш дээвиирин малгаштап, эжиктерин солаан. Керээде айыттынган хуусаада капитал септелге ажылдары доостур ужурлуг.

«Республиканың шупту школалары, уруглар садтары база техникумнары чаа өөредилге чылынга белен» - деп, сайыт Елена Самбала дыңнаткан.

Роспотребнадзорнуң Тывада удуртукчузу Людмила Салчак эпидемиологтуг сезон чоокшулап кел чыдары-биле, өөредилге албан черлери сентябрьның 1-ден эртенги хыналданы чорударын саналдаан. Аарыксап турар уругларны, башкыларны кичээлдерже киирбес. Кол санитар эмчи оон аңгыда, өөренир черлерни дезинфекциялаар чүүлдер-биле арыглап-аштаарын база катап сагындырган.