Владислав Ховалыг Улуг-Хем кожууннуң чурттакчылары-биле ужурашкан

Улуг-Хем кожууннуң чурттакчылары республика Баштыңы Владислав Ховалыгга болгаш регионда аңгы-аңгы адырларның удуртукчуларынга сонуургаан айтырыгларын салыр аргалыг болган. Шагаан-Арыг хоорайга чазак кежигүннери болгаш яамылар база ведомстволар төлээлери ажылдаан. Кожуунга келген ажылчын бөлүк-биле Россияның Маадырлары Буян Куулар, Чалым Чулдум-оол база улуг-хемчилерниң чаңгыс чер чурттуу Мерген Донгак база келген.

Ужуражылга үезинде улуг-хемчилер оларны эң дүвүреткен чидиг айтырыгларны көдүрген. Шупту санал-оналдарны болгаш дилеглерни улаштыр ажылдаары-биле демдеглээн.
«Хөгжүлдениң угланыышкынын тодарадып тура, чон-биле дорт харылзааны тудуп, оларның санал-оналынга болгаш дилеглеринге даяныры чугула» - деп, Владислав Ховалыг ужуражылга дугайында чугаалап тура, бодунуң блогунда ону демдеглээн.

2021 чылда база шак ындыг хевирге ажылдарны эрттирип, чазактың дараазында ажыл-чорудулгазынга мурнады хөгжүдер сорулгаларны айыткан Улусчу программаны тургузарының үндезини ол болган деп, регионнуң удуртукчузу сагындырган.

Эрткен үш чылда республиканың болгаш федералдыг курлавырларны хаара тудуп тургаш, муниципалдыг тургузугнуң Улуг-Хем кожуун төвүнге болгаш суурларынга элээн каш социал ужур-уткалыг объектилерни тудуп, септээн.

Шагаан-Арыг хоорайның №2 школазын база гимназиязын, Улуг-Хемниң кожууннар аразының эмнелге төвүнүң уруглар салбырын, кожууннуң Өг-бүлеге болгаш уругларга социал дуза төвүн үндезини-биле септеп, Хайыраканның хоочуннар болгаш инвалидтерниң бажың-интернадынга эмчи болгаш амыдырал-хандырылга өрээлдерлиг бирээзи-ле 40 оруннуг ийи чуртталга корпузун, 280 олуттуг уруглар садын туткан.

Чурттакчыларның күзээни езугаар Шагаан-Арыг чаартынып турар: Октябрьская кудумчузунда хөй-ниити шөлүн, өг-бүле парыгын чаагайжыткан, «Азия төвүнде көшкүн чоннуң парыгы» деп онзагай шөлдү туткан. Чонну эң дүвүреткен автооруктарның чидиг участоктарын таптыг байдалче киирер дээн ажылдарны чоорту кылып турар. Суг хандырылгазының ийи аңгы системазын туткан.

Чааты суурда шак-ла ындыг аттыг хемде көвүрүг кежигни экижиткен, Ийи-Тал биле Арыг-Бажы суурларда биче спорт залдарын, Хайыракан биле Арыг-Үзүүнде эмнелге амбулаторияларын туткан. Бо бүгү социал инфраструктураның чаа туткан болгаш эде чаарткан объектилериниң шупту даңзызы эвес-тир .

Келир чылдан эгелеп чуртта чаа төлевилелдер болгаш национал программалар ажылдап эгелээр, оларны хевирлээри болгаш бадылаары федералдыг төпте ам идепкейлиг чоруп турар болганда, чоннуң амыдыралын экижидер аргалар көвүдеп турарын Владислав Ховалыг демдеглээн.

«Социал, энергетика, орук, коммунал инфраструктураны хөгжүдеринге болгаш модернизастаарынга хөй аргалар биске тыптып келир» - деп, Тываның Баштыңы демдеглээн.

Ам эң кол айтырыг – бо чазын айыыл-халаптан когараан Шагаан-Арыгның ЧЭТ-ин кышка экижидир белеткээр. Келир чылда чаа котельная тудары планнаттынып турар. Котельная төлевилелин 2025-2030 чылдарда коммуналдыг инфраструктура чаартылгазының федералдыг комплекстиг программазынче киирип болур деп, Тываның Баштыңы чоокта чаа дыңнатканын сагындыраал. Россия Чазааның вице-премьери Марат Хуснуллин ол программаже объектини киирер дугайында Тываның дилээн деткээн.