Торгалыг суурнуң социал инфраструктуразын чаартыр

Торгалыг суурга келир чылын чаа Культура бажыңын, а бо чоокку үеде - амгы үениң школазын тудары көрдүнген. Тываның Баштыңы Владислав Ховалыг Улуг-Хем кожуунга ажыл албан аайы-биле чораанын бодунуң блогунда дыңнаткан.

Республика Баштыңы чурттакчылыг черниң социал инфраструктуразы элеп эргижирээнинден чүгле капитал септелгеге эвес, а чаа объектилер тударынга хереглелдиг апарганын демдеглээн. 1929 чылда-ла туттунган ортумак школаның бажыңы айыылдыг деп санаттынган. Айыыл чок чорукту хандырар дээш, өөреникчилер-биле кичээлдерни сөөлгү чылдарда туттунган чаңгыс чүгээр оран-савада эрттирип турар.

Бөгүн чазак национал төлевилел боттандырылгазы-биле республикага боттандырар ажылдарже Торгалыг суурнуң ажы-төлүнге чаа школа тудуунуң төлевилелин киирер дээш ажылдап турар.

«Торгалыгның школачыларынга республиканың төвүнде эш-өөрүнден ылгалбас өөрениринге эки байдалдарны тургузары чугула. Бистиң Президентивистиң эгелээшкини-биле федералдыг деткимчениң аргалары ону боттандырарынга идигни берип турар» - деп, Владислав Ховалыг демдеглээн.

Суурнуң Культура бажыңы эгижирээнинден ону аварийлиг чарлаан, ол чылдагаан-биле чурттакчылар бо чылын Шагаа байырлалын спорт залынга эрттиргеннер. Тус черниң чурттакчыларының көдүрген айтырыын база «Сорунза» губернатор төлевилели-биле 150 олуттуг культура бажыңын тудар дугайында дилээн республиканың Баштыңы деткээн. Келир чылын торгалыгжыларга чаа культура төвүн тударынга республика бюджединден 17 млн. рубльди тускайлаар.