Онза байдалдар яамызының амфибия-самоледу Тывада арга-арыг өрттерин өжүреринге дузалажыр дээш ужуп үнеринге белеткенип турар

Дүүн Бай-Хаак суурга ОБ республика комиссиязының хуралы болуп эрткен. Өрт өжүрер күштерни болгаш аргаларны хуваарынга хамаарыштыр элээн каш оперативтиг шиитпирлер хүлээп алдынган, арга-арыг өрттериниң байдалы чүгээр черлерже эки турачы улусчу дружиналар командаларын немей киирер. А чурттакчылыг черлер чоогунда өрттерни өжүреринче хөй күштү мөөңнээр.

Чазактың вице-премьери Айдын Чюдюк, Тываның арга-арыг болгаш бойдус сайыды Григорий Ондар, Тываның ХК база ОБ албанының удуртукчузу Евгений Овсянников вице-премьер Алик Монгуш-биле кады ында ажылдап турарлар.

Бай-Хаак, Дүрген база Сосновка суурларда полиция-биле кады дүнеки патрульдаашкынны организастаан. Чуррттакчыларга Бай-Хаак суурнуң спортчу төвүнде түр када чурттаар пункт ажыттынганын дыңнадып, херек апарза ынаар көжүп ап болурун сагындырган. Бо шакта ындыг хереглел чок, Таңды кожууннуң суурларын долгандыр черлерни өрттен камгалап чардынган.

Эмчилер тыныш болгаш чүрек-дамыр аарыг кижилерниң бажыңнарын кезип турар. Кыдыындан дуза херек, чааскаан чурттап турар таңдыжыларны контрольда алган. Тываның Баштыңы Владислав Ховалыгның даалгазы-биле, Тываның Росхереглекчилер хайгааралы агаарда ыштың хоразын шинчилээр алды бригаданы чоруткан.

«Бай-Хаакта байдалды көргеш, транспорт аймаа белен турарын Тываның Кадык камгалал яамызының удуртулгазынга дааскан мен – деп, Тываның Баштыңы дыңнаткан. – Кадыкшылы кошкак кижилерниң ындыг байдалга турары берге. Эмчилер амгы үеде чондан кээп турар дыңнадыгларга онза кичээнгейлиг болуру чугула".

Тывада өрт айыыл-халавы-биле 500 хире кижи туржуп турар. Эрткен хүнде бир өрттү өжүрген. Үш өрттү чавырылдырган. Амгы үеде 32 арга-арыг өрттери бооп турар. Регионда күштерни доктаамал күштелдирип турар, дүүн Красноярск крайдан келген 30 өртчү ажылче каттышкан.

Тываның чамдык кожууннарында бо дүнеки чаъс өрттү өжүрүшкени чадавас.

"Ниитизи-биле алырга, агаар-бойдустуң кончуг нарын үезинде от-биле демисел чоруп турар бис. Изиг кааң база кургаг агаар өртке идиг болган. Синоптиктер дүне чаъстаарын баш бурунгаар дыңнаткан. Бир эвес байдал өскерилбес болза, өрт өжүрер аргазы улуг амфибия самолетту хаара тудар бис. Россияның Онза байдалдар яамызының Красноярск крайда кол эргелели-биле ол айтырыгны чугаалаштым" – деп, Владислав Ховалыг Таңды кожуунче үнүүшкүн соонда дыңнаткан.