Тываның Таңды кожуунда арга-арыг өрттерин өжүржүрүнде 250 кижи немешкен

Тывада арга-арыгда бойдус өрттерин өжүрүп турар камгалакчылар бөлүктерин элээн быжыглаан. Тываның Арга-арыг яамызының медээзи-биле алырга, өрттерге удур 460 ажыг кижи хаара туттунган, эрткен хүнге деңнээрге, чүс катап хөй. Агаардан арга-арыг камгалал кезээнден, Россияның ОБЯ Тыва Республикада кол эргелелинден, Камгалал яамызындан, ХК баа ОБ албанындан специалистер, тус чер бот-башкарылга органнарының бөлүктери база эки турачы өртчү командалар ында хаара туттунган.

Таңды кожуунунда 6 өрт хып турар, оларның үжүн дунааргай изиг болгаш хаттыг агаар нарыыдаткан . 256 өрт өжүрүкчүлерин бо девискээрже шилчиткен, ында Сосновка суурже чоокшулап келген өртче 256 өртчүлерни октаан. Арга-арыг яамызының дыңнатканы-биле алырга, ооң мурнунда хүнде ийи МИ-8 вертолет суур чоогунда хөрлээлээн өрттерже сугну чашкан. Өртчүлер суур талазындан өрттү чавырылдырып, үзе кире берген, бөгүн ооң когун үзер дээш ажылдаарлар.

Чурттакчылыг девискээрлерге айыыл чок деп эксперттер саназа-даа, Таңды кожууннуң төвүнде, ол ышкаш Хадын-Аксында база Межегейге түр када чурттаар төптерни ажыткан.

Авиация дузазы-биле өрт өжүрүүшкүнү уламчылавышаан. Дүрген суурнуң Гагарин кудумчузунда 16 дугаар бажыңда оперативтиг штабты ажылдаткан. Ында сагыш човаачал хамаатылар өрт-биле демиселде кижилерге аъш-чем аймаан эккеп турар. 8(39437)29132 дугаарлыг телефонга «изиг шугум» ажыттынган. Бөгүнде өрт өжүрүкчүлеринге аъш-чем белеткээр дээш, тускай дериг-херексел – агаар үрүкчүлери, быжыглаар херекселдер, шиш баштыг хүүректер чугула херек дээрзин чагырга чери дыңнаткан.

Республикада Улуг-Хем, Тожу, Таңды, Чеди-Хөл, Каа-Хем, Тес-Хем, Чөөн-Хемчик база Кызыл кожуун девискээрлеринде 31 өрт хып турар. Дөрт өрттү өжүрген.

Бо хонуктарда Томск облазындан агаардан арга-арыг камгалалының специалистериниң база бир бөлүү чедип келир. Ында 28 кижи бар. Красноярск край, Хакасия база Иркутск облазындан коллегалары ышкаш, эң берге черлерде өрттерни өжүржүр.

Арга-арга өрттериниң байдалы баксырааны-биле 2024 чылдың август 17-ден республикада регионалдыг деңнелдиг онза байдалы чурумун чарлаанын сагындыраал. Онза байдал үезинде арга-арыг кирери хоруглуг.