Тыва Курск облазынче 20 тонна ачы-буян чүъгүн чоруткан

Курск облазының чурттакчыларынга гуманитарлыг дузаны чүдүрген чүък машиназы Бо эртен Кызылдан үнүпкен.

Украинаның Чепсектиг Күштериниң Курск облазының девискээринге террорчу халдаашкынындан когараан чурттакчыларга дузалажыры-биле «Чаңгыс демниг Россия» партияның Тыва регионалдыг салбырының идепкейжилери болгаш кежигүннери идик-хеп болгаш аъш-чем чүъгүн чыып алганнар. Бөгүн ол регионда 2024 чылдың август 13-те чарлаан федералдыг деңнелдиг онза байдал чуруму чоруп турар.

Боттарының бажыңнарын каггаш өскээр көжүп чоруткан областың чурттакчыларынга орун-дөжек херекселдери болгаш чылыдар херекселдер, савалыг суглар, аъш-чем, консервалар, чаштар чеми, бажың херекселдери, бичии уругларга болгаш улуг улуска идик-хептер, чоттунар аржыылдар болгаш уруглар ойнаарактарын ​​чыып алган.

ТШО киржикчилери бистиң шериглеривисче чүъктү чаңгыс эвес удаа үдежип чедирген Дээди Хурал депутады Эрес Михпйлович Хуурак бо удаада 20 тонна ачы-буян чүъгүн Курск облазынга хүлээдир. Август 6-да УЧК талазындан калбаа-биле халдап киргениниң соонда он-он тайбың чурттакчылар когараан, ынчангаш Тываның Баштыңы Владислав Ховалыг элээн каш шиитпирлерни үндүрген, ооң бирээзи – когараан регионга дузаламчы чүъктү дарый чорудар даалганы бергенин сагындыраал. Тываның чурттакчылары социал четкилерде Курскының чурттакчыларын деткип, айыыл-халапка таварышкан улуска дуза чедиреринге беленин илереткеннер.

Киевтиң оор езу-биле халдаашкыны ооң кончуг улуг частырыы болур болгаш, ээлчеглиг аштырыышкыны апаары чигзиниг чок. Амдыызында Курск облазының болгаш өске-даа кызыгаар чоогу девискээрлерниң чурттакчыларын деткиири -  бистиң кижи бүрүзүнүң хүлээлгези-дир. Дузаламчы чүъктү чыырынга киришкен республиканың бүгү чурттакчыларынга өөрүп четтирдим. Чаңгыс чурт бис, кады тиилээр бис!» - деп, Тываның баштыңы Владислав Ховалыг чугаалаан.

Бистиң республикавыс Курск облазындан өскээр көжүрген кижилерни хүлээп алырынга белен. Бо гуманитарлыг чүък беш хонук дургузунда чеде бээр ужурлуг, «Чаңгыс демниг Россия» партияның хөй-ниити хүлээп алыышкын черинге ам дараазында куряннарже чорудар дузаламчыны чыыр.