Төөгү эртемнериниң кандидады А. Канзайга күрүне шаңналын тывыскан

Тыва Республика хүнүнде база бир шаңнал алган кижи - Тыва Республиканың алдарлыг ажылдакчызы, төөгү эртемнериниң кандидады Алдын-оол Канзай болган. Аңаа «Буян-Бадыргы» орденниң III чергезин тывыскан.

Тываның билдингир партия болгаш хөй-ниити ажылдакчызы Эрзин кожууннуң Мөрен суурга төрүттүнген. Кызылдың башкылар институдун дооскаш, Бай-Даг, Ак-Эрик школаларынга башкылап, директорлап ажылдаан. Комсомол ажылының үезинде инструктордан эгелээш, комсомол обкомунуң ийиги секретарынга чедир ажылдаан. 1970 чылда СЭКП Төп Комитединиң чанында заочно Дээди партия школазын бот-өөредилгелиг дооскаш, ийи чыл эрткенде СЭКП Төп Комитединиң чанында Ниитилел эртемнериниң академиязының аспирантуразынче киргеш, национал айтырыглар теориязы болгаш практиказының талазы-биле эртем ажылын чедиишкинниг камгалап алган.

Алдын-оол Кангаевич СЭКП обкомунуң аппарадында сектор эргелекчизи, агитация болгаш пропаганда килдизиниң эргелекчизи база СЭКП обкомунуң идеология талазы-биле секретарынга ажылдаан.

2008 чылдан ТГШИ-ниң төөгү секторунуң башкарыкчызы ажылдакчызы бооп ажылдап турар. Ооң эртем шинчилелинде политиктиг репрессияларны, совет болгаш совет үениң соонда Тывага националдар аразында харылзааларны көөрү, совет үеде республиканың социал-экономиктиг болгаш культурлуг хөгжүлдези дээн ышкаш чидиг болгаш маргылдаалыг айтырыглар кирип турар.  

Хоочун байыр чедириишкин сөстеринде чаңгыс чер чурттугларын төрээн чериниң хөгжүлдези дээш кызымаккай ажылдаарынче кыйгырган.